Ataatsimiititaliap aningaasanut inatsit amigartooruteqanngitsoq takorusuppaa

Inatsisartuni Aningaasanut Akileraartarnermullu Ataatsimiititaliap, Naalakkersuisup aningaasanut inatsisissatut siunnersuutaa aappaagumoortoq tapersersunngilaa. 2021-mi sipaarniarfiusinnaasunik ujartueqqusivoq, aningaasanut inatsit amigartoorfiunngitsoq, imaluunniit sinneqartoorfiusoq angujumallugu.

Naalakkersuisoq Vittus Qujaukitsq aappaagu aningaasanut inatsisissatut siunnersuummik ataasinngornermi saqqummiussivoq.

Coronap ajalusoortitsinerata kingunerisaanik aningaasaqarnerup ingerlanneqarnerata qasukkaallatsinneqarnissaanik taanna siunnersuuteqarpoq. Tamanna isumaqarpoq aningaasanut inatsit aappaagumut 183,3 milliuunit koruuninik amigartoorfiusussatut naatsorsorneqarsimasoq.

Isumaqatiginninniarnerillu suli aallarteqqajanngitsut, tamanna Aningaasaqarnermut Akileraartarnermullu Ataatsimiititaliap isornartorsiorpaa. Ataatsimiititaliap tusagassiorfinnut nalunaarutaani tamanna allassimavoq.

- Naalakkersuisut inatsisissatut siunnersuutaat maannatut isikkoqartilluni ataatsimiititaliamit maannangaaq akuersaarneqarsinnaanngitsumik annertussuseqartumik amigartoorfiusussaasoq ataatsimiititaliamit oqaatigineqassaaq, ilaatigut allassimavoq.

Naalakkersuisut aningaasanut inatsimmi siunnersuuteqarput 2021 amigartoorfiungaatsiassasoq, ukiulli tulliinut pingasunut missingersuusiornermi sinneqartooruteqalaartoqassasoq naatsorsuutigalugu.

Pisortat kiffartuussinerat ajalusoortinneqassanngitsoq

Ataatsimiititalialli tamanan peqataaffigiumanngilaa. Naalakkersuisulli sipaarniaqqullugit maanna kaammattuipput.

- Taamaattumik sipaarutissatut siunnersuutinik tigussaanerusunik, aningaasat ukiuanni 2021- mi kiisalu tamatuma kingorna ukiuni missingersuusiorfiusuni aningaasanut inatsisip oqimaaqatigiinnissaanik imaluunniit sinneqartoorfiunissaanik qulakkeerinnissinnaasunik, Naalakkersuisunit nassinneqarnissani ataatsimiititaliap kissaatigaa, allapput.

"Annertoorujussuarmilli" sipaarniartoqarnissaa pinngitsoortinniarlugu Naalakkersuisut amigartooruteqarnissamik siunniussisut, aningaasanut inatsisissatut siunnersuutigineqarpoq.

Ataatsimiititaliaq Uummannami qaammat una missingersuutit pillugit isumasioqatigiinnermini aningaasanut inatsisissatut siunnersuut misissorsimavaa.

Powered by Labrador CMS