Politikeri Aaja Chemnitz (IA) Folketingip Issittumi inatsisartut sinniisuattut kisiartaalluni pingajussaanik qinigaaqqippoq.

Aaja Chemnitzilu ataatsimiititaliami siulittaasutut ingerlaqqissinnaaneranut tamanna kinguneqarpoq, maannamullu 2024-p tungaanut atuutissaaq.

- Nuannaarutigaara siulittaasuunera ingerlatiinnarsinnaagakku. Taamaalilluni ataatsimiititaliami suliagut aningaasatigut ineriartortitsinermut, silap allanngoriartornerata kingunerisaanik najukkamik tulluarsaanermut tunngasut, aammalu issittumi avannarlermi inuit inoqqaavisa inuttut piginnaatitaaneranut tunngasut ingerlatiinnarsinnaavagut, Aaja Chemnitz tusagassiuutinut nalunaarummi taama oqaaseqarpoq.

- Suleqatigiinneq aatsaat taama pingaaruteqartigaaq

Issittumi Avannarlermi Aallartitani ilaasortat tassaapput Issittumi Avannarlerni nunat arfineq marluk Canada, Finland, Island, Norge, Sverige, USA taavalu Kalaallit Nunaat aamma Danmarki. Ilaasortaasut nunani issittumi avannarlermi pingaarnerpaamik ukkatarineqartut tassaapput nunani issittumi unammillernartuni assigiissutigisagut issittumilu naalakkersuisunut unammilligassaasut.

- Ukrainemi sorsunnerup aammalu silaannaap allanngoriartornerata kingorna unammilligassat pissutaallutik issittumi nunat ikioqatigiinnissat aatsaat taama pingaaruteqartigaaq. Unammilligassat, kisiannili aamma periarfissat nutaajusut aallartissinnaasat aaqqiissutissallu suliarisinnaasagut amerlammata, Aaja Chemnitz taama oqarpoq.

Inatsisartut ataatsimiititaliamut sinniisumik siunissami toqqaasinnaalissasut, politikerip neriuutigaa.