Ataatsimiititaliamit Kalaallit Nunaanni kulturikkut kingornussat pitsaanerusumik inissinneqarnissaat ujartorneqartoq

Kukkusumik toqqorsiveqarneq, oquk uumasullu ajoqutaasut pissutigalugit Kalaallit Nunaanni kulturikkut kingornussat annaaneqariaannaapput. Taamatut oqasseqarput Inatsisartut kultureqarnermut ataatsimiititaliaat.

Kalaallit Nunaanni kulturikkut kingornussatut eriagisassat taartissaqanngitsullu toqqorsiviluttumiittut annaaneqariaannaapput.

Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaanni ilaasortat, Nivi Olsenimik Demokraatineersumik siulittaasullit taamatut isumaqarput.

- Eriagisassat taartissaqanngitsut katersugaasivimmiittussat nalilerneqarsinnaanngitsut illutoqqani toqqorsivittut naleqqutinngitsuni maannakkut inissinneqarsimapput. Oqummik uumasunillu ajoqutaasunit ulorianartorsiortinneqarlutik, eriagisassat taartissaqanngitsut oqaluttuarisaanermilu pingaaruteqarluinnartut katersugaasiviup illuutaani toqqorsivinni immamut qanittuaqqamiittuni mallinillu qaararneqartuni aseroriaannaallutik inissinneqarsimapput, ataatsimiititaliamit oqaatigineqarpoq.

Ataatsimiititaliaq isumaqarpoq, kulturikkut kingornussat illersorniarlugit aningaasaliissuteqarnissaq salliutinneqartariaqartoq.

- Kalaallit Nunaanni kulturikkut kingornussat aserorneqassanngippata toqqorsiviit nutaarluinnaat pisariaqartippavut. Oqummit uumasunillu ajoqutaasunit saassunneqaqqunagit kukkusumillu silaannaap isugutaanit aserorneqaqqunagit kulturikkut kingornussassarsiavut eriagisassat taartissaqanngitsut toqqorsivinnut naleqqulluinnartunut inissittariaqarpavut, ataatsimiititaliaq ataatsimut oqaaseqarpoq.

Kulturikkut takornariaqartitsineq periarfissaasoq

Kultureqarnermut ataatsimiititaliaq Kalaallit Nunaanni kulturikkut kingonussat takornariartitsisarnermik siuarsaanissamut qanoq atorneqarsinnaanerat pillugu nunanit allani isumassarsiorsimavoq.

-

Kulturikkut takornariaqartitsinikkut nunat oqaluttuarisaanerinut soqutiginninneq pilersinniarlugu ineriartortitsinermillu pilersitsiniarluni nunarpassuarni allani kulturi atorluarneqartarpoq. Tamannalu aamma pinngitsoorani Kalaallit Nunaanni pisinnaasariaqarpoq. Kulturerput immikkuullarilluinnarpoq, oqaluttuassaanermi immikkuullarilluinnartumik oqaluttuassartaqarluni. Taamaammat annertunerusumik aningaasarsiorfissatut kulturerput isigisariaqarparput, taamaasiornikkut siunissami ukiorpassuarni illersugaalluni ataasinnaaqqullugu, Ataatsimiititaliaq isumaqatigiittoq nassuiaavoq

.

Powered by Labrador CMS