Ataatsimiititaliami ilaasortat: Matoqqasumik ingerlatsinerup oqartussaaqataaneq ajoquserpaa

Nipisattassiissutinik qaffaasimaneq pillugu suliamut Kim Kielsen akulerutinngikkallarmalli, Inatsisartut Aalisarnermut, Piniarnermut Nunalerinermullu Ataatsimiititaliaata pisimasoq misissorlugu aallartissimavaa.

Ataatsimiititalialli suliaqarniarnera oqitsuinnaasimanngilaq, suliami qitiusumik uppernarsaatissanik tunineqarsimannginnamik. Tamanna tunngaviuvoq, ataatsimiititaliami ilaasortaasunit arfineq-marluusunit pingasut ikinnerussuteqarlutik oqaaseqartariaqarsimanerannut.

- Akuersaarneqarsinnaanngilluinnarpoq Naalakkersuisut paasissutissanik tunniusserusunnginnerat, tamanna oqartussaaqataaneq tunngavigalugu aaqqissuussaanitsinnut toqqaannartumik ajoqutaavoq, ataatsimiititaliami siulittaasup tullii Aqqaluaq B. Egede (IA), Múte B. Egede (IA) aamma Hans Enoksen (PN) oqarput.

Pingasoriarlutik itigartinneqarsimasut

Aalisarnermut Ataatsimiititaliamit, Naalakkersuisut isummernissaannut tunngavissiaq, nipisattassiissutinik qaffaanissamut tunngavissiisimasoq ataasiaannarani piumaneqartarsimagaluarpoq, pingasoriarlutilli itigartinneqartarsimapput. Allagaatinik takunnissinnaatitaanermut inatsit, tusagassiortut pisortat ignerlatsineranni allagaatinik takunninnissamut qinnuteqarnerminni aamma atortagaat tunngavilersuutigalugu itigartinneqartarsimapput.

Tamannalu Inatsisartut Suleriaasianni §14-imut naapertuutinngilaq, ataatsimiititaliami ilaasortat isumaqarput.

§ 14.

Imm. 2. Susassaqarfimmut atatillugu ataatsimiititaliap sukkulluunniit pisussaaffigigaa, Naalakkersuisut inatsimmi aamma pitsaasumik ingerlatsinissamut maleruaqqusanik malinninnersut nakkutigissallugu.

Imm. 3. Ataatsimiititaliap apeqqut allakkatigut akissuteqarfigineqassasoq piumasarippagu, Naalakkersuisut ataatsimiititaliap piumasaanik naammassinnissapput. Naalakkersuisut ataatsimiititaliap paasissutissanik pissarsisinnaanera taamaallaat killiliiffigisinnavaat, pisortat inuinnaallunniit soqutigisaannit annertunerusumik ataatsimiititaliaq paasisaqarusussappat.

Ataatsimiititaliami ilaasortat taakku pingasuullutik erseqqissaatigaat, susassaqarfimmut atatillugu ataatsimiititaliap sukkulluunniit pisussaaffigigaa, Naalakkersuisut inatsimmi aamma pitsaasumik ingerlatsinissamut maleruaqqusanik malinninnersut nakkutigissallugu.

- Naalakkersuisut ataatsimiititaliami sulinerput akornusersorpaat. Aaamma Kim Kielsenip paasissutissanik tunniusserusuttarani matoqqasumillu ingerlatsilluni aqutsinera imatut tupaallannanngikkaluartoq, aalajangiisimaneq Kim Kielsenip siuttuuffigisimasaa ajuuvittumik ajortoqarneranik uagutsinnut eqqarsarnarpoq, taakku pingasuullutik oqarput.

Saqqummiunneqarlik

Taakku paasisinnaanngilaat, Naalakkersuisut sooq Inatsisartut ataatsimiititaliaanut paasissutissanik tunniusserusunngeriarlutik, pisimasoq pillugu Kammeradvokatimut suliassanngortitsisimanersut.

- Ajortoqanngippat Kammeradvokat sakkuliullugu toqqorterinermut sanilliullugu, paasissutissat tamarmik saqqummiunneqarniarlik, taakku oqarput.

Taakku aamma isumaqarput, Naalakkersuisut suleriaasiannik nakkutiginninnissamut oqartussaaffik taanna kukkusuusoq.

- Kammeradvokati Inatsisartut sulinerannut akuliuttussaatitaanngilaq, Inatsisartut inatsit atuuttoq naapertorlugu Naalakkersuisut sulinerannik nakkutilliisussaammata. Naalakkersuisut tamanna ataqqisariaqarpaat, paasissutissanillu sunilluunniit ingerlaannartumik tunnissisarlutik, ataatsimiititaliami ilaasortat taakku pingasut naggasiipput.

Sineriammi aalisartut soqutisisallillu allat Nuummi Maniitsumilu pisassiissutinik qaffaasoqarsimaneranik tupigusuuteqartut saaffiginnittarsimanerat pissutigalugu ataatsimiititaliaq misissuilluni aallartissimavoq. Ataatsimiititaliamit tamatuma saniatigut nipisanniartarnerup MSC-mik meqqiligaasimanerata annaaneqarsinnaanera ernummatigineqarpoq.