Ataatsimiititaliami ilaasortat ikinnerusut anguniarneqarput
Partiit naalakkersuisuutitaqartunit kissaatigineqarpoq Inatsisartuni ataatsimiititaliami ilaasortat arfineq-marluusinnaanerat atornagu, ataatsimiititaliat tamarmik tallimanik ilaasortaatitaqalissasut. Tamanna matoqqanerulersitsissaaq, Suleqatigiissitsisunit Tillie Martinussen isumaqarpoq.
Obs: Atassut siulittaasuata, Aqqalu Jerimiassenip pisoq pillugu oqaaseqarnera 30. maj nal. 08.15 ilanngunneqarpoq.
Siumut, Nunatta Qitornai aamma Demokraatit piumasaqarput ataatsimiititaliami ilaasortat arfineq-marluusimappata marluk peerneqassasut. Ataatsimiititaliani ilaasortat ilaat arfineq-marluusinnaagaluartut, tallimaannanngortinneqassapput.
Naalakkersuisoqatigiit nutaat inissititerneqareernerani ataatsimiititaliat nutaat ivertinneqarpata ilaasortat arfineq-marluusinnaajunnaassagunarput.
Inatsisartuni siulittaasoqarfik qinnuteqaammik tigusaqarsimavoq, ataatsimiititaliani tamani ilaasortat tallimaalissasut, ataatsimiititaliallu arfineq-marlunnik ilaasortaqarsinnaanerat atorneqassanngitsoq. Partiit amerlanerulernerat pissutigalugu, peqataatitsinerunissarlu qulakkeerniarlugu, ataatsimiititaliat ilaanni ilaasortaasinnaasut amerlineqarnikuupput.
Naalakkersuisoqatigiinnut 3-2
Ataatsimiititaliani ilaasortat ikilisinneqarpata, partiit issiasuutitaqartut aamma ikilissapput. Naalakkersuisuutitaqartut sisamanik issiasuutitaqartut, illuatungiliuttut pingasunik issiasuutitaqartaraluarput. Maannali 3-2-mik naalakkersuisuutitaqartut amerlanerulissapput.
Suleqatigiissitsisut Inatsisartuni ilaasortaatitatuaat, Tillie Martinussen isumaqarpoq, taama iliorneq politikkikkut sulinermi matoqqanerulernermik kinguneqassasoq:
- Taama iliornermi 100 procentimik qinikkat allat ipitinneqassapput isorinnittullu nipangersivinneqassallutik. Pissaanermik atornerluineq ersarilluinnarpoq, Tillie Martinussen allappoq.
- Tamat oqartussaaneranik ingerlatsisutut taaneqartussaagaluarpugut. Amerlanerussuteqartuniilli kisermaassilluni naalakkersuinertut isikkoqarneruleriartuinnarpoq.
Atassutip siulittaasua Aqqalu Jerimiassen, ataatsimiititaliami ilaasortat ikilisinneqarnissaanut aamma isornartorsiuivoq.
- Iliuuserineqartoq ammanerusumik oqallinnissamut akerliuvoq, partiinullu minnernut oqartussaaffiiaanerulluni. Naalakkersuisut amerleriarlugit, ataatsimiititaliat millisarlugit. Taanna Atassummit akerlerineqarpoq, Aqqalu Jerimiassen isummerpoq.
Isornartorsiuisut nipangersinneqassapput
Suleqatigiissitsisuni siulittaasup partiit naalakkersuisuutitaqartut iliuusaat sakkortuumik isornartorsiorpaa. Isumaqarpoq isornartorsiuisut isumaannik ipititsiniarnerusoq.
- Illuatungiliisut taama ipitinneqarsinnaappata, taavami ilissi nammineq illuatungiliigussi? Tapersersunngikkaluarutsigulluunniit, tamat oqartussaanerani periarfissasi aamma ilissi eqqorneqarujussuassapput. Sooq isornartorsiuisunut illuatungiliuttunullu suut tamarmik toqqorneqassappat? Ajorluinnarpoq. Akuerineqarsinnaanngilaq, Tillie Martinussen oqarpoq.
Inatsisartunit ataatsimiititaliani ilaasortaqarnissaq matoqqasumik maanna oqaluuserineqarpoq.