Kukkunersiuisut misissuinerat
Ataatsimiisitaliap Naalakkersuisut oqaaseqaataat tiguaa
Kukkunersiuinermut ataatsimiisitaliap Naalakkersuisut Naalakkersuisuusimasut misissuiffigineqarneranut nalunaarusiamut oqaaseqaataat tiguaat
Inatsisartut kukkunersiuinermi ataatsimiisitaliaata bankboksi oqallisaaqisoq, aammalu Naalakkersuisuni ilaasortaasarsimasut nunatta karsianik atuisarsimanersut pillugit misissuisimanermik imalik, decembarip 17-ani ammarpaat. Naalakkersuisullu nalunaarusiamut oqaaseqarnissaminnut piffisaliunneqartoq decembarip 30-ani kinguartippat januaarip 16-anut pisussanngorlugu.
Atuaruk: Kuupik Kleistip misissuinerup inernera akuerinngilaa
Takussutissaq: Kikkut akiitsoqarsimanersut takukkit
Kukkunersiuinermut ataatsimiisitaliap siulittaasuata, Demokraatineersup Randi Vestergaard Evaldsenip, maanna uppernarsarpaa ataatsimiisitaliap Naalakkersuisut nalunaarusiamut oqaaseqataat tigusimagai.
- Naalakkersuisut nalunaarusiamut oqaaseqataat tiguagut. Kisianni tamatuma saniatigut allamik oqaaseqarnianngilanga, ataatsimiisitaliamimi ilaasortat naapeqqaartussaapput Naalakkersuisullu oqaaseqataat misissorlugit, Demokraatineersoq Randi Vestergaard Evaldsen Sermitsiaq.AG-mut taama oqarpoq.
Kukkunersiuinermut ataatsimiisitaliap siusinnerusukkut nalunaarutigereernikuuaa ataatsimiisitaliaq nalunaarusiaq pillugu oqaaseqarnianngikkallartoq, Naalakkersuisut oqaaseqaataat tigoqqaartinnagit.
Atuaruk: Ataatsimiisitaliaq: Bankboksi ammarneqarpoq
Atuaruk: Aajuna kukkunersiuisut nalunaarusiaat