Ataatsimeersuarnermi takornariaqarnerup inerisarnerunissaa anguniarneqartoq

Inuussutissarsiutip ineriartornissaa, ineriartortuarnissarlu anguniarlugu ukiuni tulliuttuni nutaanik pilersitsiortornissaq siunertaavoq.

Ataatsimut nukittuneruvugut

- Ataatsimeersuarnermi Towards more Tourismemi aallaavigineqarpoq, ukiuni kingullerni marlunni takornariaqarnerup annertuseriarsimanera. Mittarfeqarnermut atatillugu aaqqissuussap kinguneranik takornariarfissat tikikkuminarnerulernissaat ilimanarpoq, Kalaallit Nunaannullu takornariarumasut aatsaat taama amerlatigalutik. Taamaammat Air Greenland suleqatigalugu “Together we are stronger” qulequtaralugu Kalaallit Nunaanni takornarialerisut ulluni marlussunni ataatsimeersuarnissamut aggersarpagut, akisussaassusilimmik akornusersuutaanngitsumillu takornariaqarnerup inerisarnissaanut qanoq periuseqarnissaq oqaluuseriniarlugu, Visit Greenlandimi pisortaq, Julie Pars, ataatsimiinnerup aallartinnginnerani oqaaseqarpoq. Ullormut ataatsimiinnermi takornarialerinerup iluani immikkut suliaqartut aqqanillit saqqummiissapput.

Misigisassarsiornerit

Ataatsimeersuarnerup imarisai arlaqarput, pingaartumilli misigisassarsiorluni takornariarneq inituvoq, misigisassarsiorlutimmi takornariartut annertunerusumik akiliuumasarput.

Ataatsimeersuarneq Bannikinimi pisortap Natasha Martinip ammaanersiorlugu oqalugiarpoq. Suliffeqarfik Bannikin Amerikap avannaani Asiamilu misigisassarsiorluni takornariartitsinermik suliaqarpoq.

Taassuma ammaanermini oqaatigaa misigisassarsiorluni takornariartitsineq inerisarneqarluarsinnaasoq.

- Akitigut unammillersinnaanasi nalunngilarsi. Taamaakkaluartoq immikkuullarilluinnartunik tuniussaqarsinnaagassi pitsaasuuvoq, tamannalu isumaqarpoq suleqatigiittariaqartusi, Natasha Martin oqarpoq. Taassuma ilanngullugu oqaatigaa Kinami misigisassarsiorlutik takornariartut ukiumut 37,7 milliuuniusartut.

Misigisassarsiorluni takornariartitsinerup imminut nammassinnaanissaa anguniarlugu, najugarisani tunngavissanik malittarisassanillu pilersitsisoqassasoq, Natasha Martinip ilanngullugu kaammattuutigaa.

Air Greenland aaqqissuisooqataavoq

Air Greenland ataatsimeersuarnermi aaqqissuisooqataavoq. Takornariaqarnerummi ineriartortinneqarnissaa timmisartuutileqatigiiffiup soqutigisaanut ilaalluinnarpoq, tamanna bilitsinik tunisinernit isertitaqarnerulersitsisussaammat.

- Kalaallit Nunaanni takornariaqarnerup akornusersuutaanngitsumik pitsaasumillu ineriartortinneqarnissaanut tapertaanissarput, ingerlatsivittut annertuumik soqutigisaraarput. Kalaallit Nunaata annertusiartuinnartumik takornariarfigerusunneqarnera malunnartumik annertusiartuinnarmat, siunissami angalasut amerlanerit takornariaqarnermut attuumassuteqarnissaat ilimagaarput. Nunatsinni sumiiffinni tamani ukioq naallugu pitsaanerusumik takornariaqarnerup annertusiartortinneqarnissaata qulakkeernissaa unammilligassat pingaarnersarissavaat. Unammilligassat tamakkua aaqqiissutissaannik takornarialerisuusugut nassaarniartariaqarpugut, taamaammat akisussaassusilimmik akornusersuutaanngitsumillu takornariaqarnerup ingerlannissaanut ataatsimeersuarnermi siunnersuutit qulit misissornissaat qilanaaraara, Maliina Abelsen, Air Greenlandimi niuernerup pisortaq tusagassiutinut nalunaaruteqarluni allappoq.