Ataatsimeersuarneq: Pissanganarluinnarsinnaasoq
Ullumi sapaammi taasisoqarnerani siulittaasumut qinigassanngortittut taasinerit 50 procentii angunngippatigit, Siumumi siulittaasumut qinerseqqittoqarsinnaavoq.
Nuna tamakkerlugu ataatsimeersuarneq tallimanngornermi unnukkut nalunaaqutaq 19.00 aallartittoq, sapaammi nalunaaqutaq 14.45-mit naammassinissani qanillissavaa, siulittaasumut qinersineq, kingornalu siulittaasup tullianik siulersuisuunernillu qinersinerit aallartippata.
Ataatsimiittoqarnerani aallartitat akornanni Sermitsiaq.AG-p oqaloqatigisaani kina taperserneqarnerpaajumaarnersoq suli paasinarsinngilaq.
Aallartitat amerlanerit kina taajumaarnerlugu suli oqaatiginnginnamikku, ukiorpassuarni aatsaat siullermeerluni oqaatiginnittoqannginneranik misigisaqarluni, Siumumi politikeri qitiusoq ilisimatitsivoq.
Kielsen vs Jensen
Taamaalilluni Kim Kielsenip aamma Erik Jensenip akornanni qinerseqqittoqarsinnaanerani, politikerip qitiusup aallartitat akornanni piukkunneqarnerpaasorisani pillugit taama isumaqarpoq.
Kisianni taasinermi siullermi pingasuusunit ataatsip taasinerit 50 procentii aatsaat pissarsiarinngippagit qinerseqqittoqarsinnaavoq. Qinerseqqittoqassagaluarpat, taasinernik ikinnerpaanik pissarsisoq qinerseqqinnermi peqataassanngilaq.
Qinerseqqittoqassappat taaguunneqarnerpaaq Siumumi siulittaasutut qinerneqassaaq. Qinigassanngortittup aappassaaneernermi taasinerit 50 procentii angunngikkaluarunigilluunniit.
Aallartitat 69-it
Nuna tamakkerlugu ataatsimeersuarnermi aallartitat 69-it peqataapput, najukkami immikkoortoqarfinneersut, Siumup inuusuttaaneersut, Inatsisartunut, Naalakkersuisunut, Folketingimut aamma siulersuisuunernut ilaasortat.
Aallartitanit 69-nit ilaasortat arfineq-pingasut sila pissutigalugu Nuummut tikinngitsoorput. Taakku arfineq-pingasut oqarasuaatikkut nuna tamakkerlugu ataatsimeersuarnermut peqataapput, taamaattumillu ualimut taaseqataasinnaallutik. Upernaviulli eqqaaneersoq ataaseq taaseqataanngitsooriaannaavoq, nunaqarfiani oqarasuaatinut attaveqaatit ajornerat pissutaalluni.