Ataatsimeersuarneq nipaatsumik akerliunermik takutitsiviusoq

- Kalaallit meerartaannut siunissaq suua?

- Hvad er fremtiden for de grønlandske børn?

Aamma:

- Ulloqeqqasiutitit qanoq ippat?

Oqariartuutit marluk aalajangiisartorpassuarnut marlunngormallit Kalaallit Nunaata siunissaa pillugu Sulisitsisut Future Greenlandimi oqallitsitsinerannut eqqissisimasumik tunniunneqartut takuneqarsinnaapput.

Pulaartut ulloqeqqasiorneranni saavanni sooq takutitsinersut, Sermitsiaq.AG-p akissutiffiginngilai. Tassami akerlissutsimik takutitsisut marluk qanii nipitittagarsuarnik asserneqarsimapput. Kisianni DR-ip piviusulersaarusiaanut Tasiilami meeqqanut sumiginnakkanut tunngasumut innersuussisoq ersarippoq, taanna innuttaasunut aamma politikerinut annertuumik oqallitsitsivoq.

Illorsuup iluani Hans Lyngep inersuaani meeqqat siunissaat annertuumik oqallisigineqarpoq, naak professorit kisitsisileralutillu nunap aningaasaqarnera pillugu oqalugiartarfimmit oqaluuserinnikkaluartut.

Professori Torben M. Andersen, Kalaallit Nunaanni Aningaasaqarnermut Siunnersuisoqatigiinni siulittaasoq, oqallinnermi oqaatigaa, siuariartornissamut piumasaqaat annerpaaq tassaasoq, meeqqat atuarfiata pitsanngornissaa, taamalilluni inuusuttut inuussutissarsiutinik ilinniagaqartut imaluunniit qaffasinnerusumik ilinniagaqartut amerlanerulissammata, taamaalilluni Kalaallit Nunaat arlaanni Danmarkimit naalagaaffiup tapiissutaanik pisartagaqarnani aningaasaqarnikkut namminersulissammat.

- Meeqqat atualinnginneranni iliuuseqarfiginissaat misissuinerit arlallit oqaatigereeraat qularnanngilaq. Atukkat arlallit ukkatarineqassapput. Ilikkariartorneq kisimi pinnani, kisianni aamma isumaginninnikkut aamma ilaqutariinnit atukkat. Ullaakkut makittarpat, oqaatsit ilikkartarpaat aamma ilinniakkerinerminni ikiorneqartarpat, professori ilaatigut oqallinnermi oqaatigai.