Ataatsimeersuarneq Greenland Forum Nuummi aasamut ingerlanneqassaaq
Greenland Forum ukiut marluk tulleriit taamaatiinnarneqartareerluni Nuummi augustimi ingerlanneqartussatut pilersaarutigineqalerpoq.
Kalaallit Nunaat nunarsuarmi issittumi: silap pissusia aamma atugarissaarneq – geopolitikki aamma ineriartorneq.
Sammisat taakkuupput ataatsimeersuarnermi Greenland Forumimi Nuummi aasamut ingerlanneqartussami peqataasunit eqqartorneqartussat. Ataatsimeersuarneq Naalakkersuisut aamma Arctic Circle Assemblyp suleqatigiillutik pilersaarusiugaat 27.-29. august 2022 ingerlanneqassaaq.
Ataatsimeersuarneq ukiuni marlunni kingullerni taamaatiinnarneqartarsimavoq.
Namminersorlutik Oqartussat taama tusagassiorfinnut nalunaaruteqarput.
- Nunarsuarmioqataanitsinni annertuumik sulissutigivarput ikinngutitta, suleqatigisssattalu annertusarlugit nukitsorsarnissaat, pingaartumik nunat sanilerisatta qaninnerit akornanni.
Naalakkersuisut kissaatigivaat Issittoq pillugu suleqatigiinnermi oqallinnermilu ersarissumik Kalaallit Nunaat pillugu aamma inuiaqatigiinni eqqissisimasumik piujuartitsinermillu ineriartortitsinitsinnik inissisimanitsinnik ukkatarinninnissaq. Taamaammat nuannaarutigivara kissaatit taakkorpiaat ataatsimeersuarnermi qulequttani ersersinneqarmata, Naalakkersuisut siulittaasuat, Múte B. Egede oqaaseqarpoq.
Arctic Circle Assembly, nunat tamalaat akornanni attaveqaataasut annerpaat ilaattut, Issittoq pillugu oqalliffiullunilu suleqatigiiffiiusup immikkoortuattut Greenland Forum ingerlanneqassaaq. Arctic Circle Assembly ornigarneqarluarluni naalakkersuinikkut sulialinniit, kattuffinniit, suliffissuarniit, ilisimatusarfinniit, isummersoqatigiiffinniit, avatagiisit pillugit suliniuteqarfinniit, nunap inoqqaaviniit aammalu Issittoq pillugu ineriartornermut soqutigisaqartuniit peqataaffigineqartarpoq.
- Inuiattut issittormiuusutut, qitiulluinnartumik Issittoq pillugu qulequttanik oqallinnerni aammalu aalajangiisarnerni inuiaqatigiitsinnut tunngasuni inissisimavugut. Taamaammat nuannaarutingaara Arctic Circle peqatigalugu ataatsimeersuarneq Nuummi ingerlanneqassasoq isumaqatigiissutigingatsigu. Ataatsimeersuarnermut nunat tamalaaneersut, ungasissumiit qanittumiillu tikittussat tikilluaqqunissaat qilanaarivara, Múte B. Egede oqarpoq.