Ataataq napparsimasoq ikiorneqanngilaq
Knud Serritzlev decembarimi 2021-mi napparsimalerami inuunera allanngorluinnarpoq. Taamanikkulli pisortanit ikiorsiissutisinissaminut ilungersulerpoq, misigaali itigartinneqartuarnini – tamannalu namminerminut aamma ilaqutaanut ajornartorsiortitsingaalerpoq. Aarleqqutigaa inigisaminnit anisitaanissartik, misigisimavorlu takusinnaajunnaarlugu inuunini qanoq kinguneqassanersoq.
Decembarimi ulloq nalinginnaasuuvoq Nuummi sanaartortitsinermik suliffeqarfimmi sulisartutut sulinermini 52-inik ukiulik Knud Serritzlev uissanngulerami. Qaammat ataaseq tamatuma siornatigut peqqinngitsutut misigisami Dronning Ingridip Napparsimavissuanukarpoq. Nakorsat paasisinnaanngilaat sumik ajoquteqarnersoq, Knud Serritzlevilu angerlartinneqarpoq imermik imerluartaqqullugu panodilinillu iiseqqullugu. Kisianni ulloq taanna decembarimi misigisimavoq peqqinngilluinnarluni.
Knud Serritzlev napparsimavimmut ulluni 14-ini unitsinneqarpoq, nakorsat paasinngilaat sumik nappaateqarnersoq. Angerlarteqqinneqarpoq ukiortaareermallu sulisartutut sulileqqilluni. Peqqinngikkaluttuinnarporli, anersaartorpiarsinnaajunnaarlunilu, aamma Knud Serritzlev maannakkut sukumiisumik misissortinnissani noqqaassutigaa.
Aassiortikkama aamma taqakkut misissortikkama paasineqarpoq qarasaanni taqqamik milittuulaarsimasunga uummatinnilu putoqartoq. Danmarkiliartinneqarput, nuliara ilaavoq, ikinngutit ilaquttallu qitornavut paarivaat, Knud Serritzlev oqaluttuarpoq.
Uummataani putoq suliarineqarpoq kingornatigullu sapaatit akunneranni sisamani Rigshospitalimi uninngatinneqarluni. Tamannali tassa Knud Serritzlevip napparsimanerata aallartinneriinnaraa.
Utaqqinerujussuaq
Knud Serritzlevip inuunerani decembarimiilli pisoqartorujussuuvoq. Kingornatigut qaratsamini taqqamigut pingasoriarluni milittuulaarpoq, naallu Nuummut utereeraluarluni – inuunera - nammineq aamma ilaquttami inuunerat – allanngorluinnarsimavoq. Knud Serritzlevip pisunneq oqalunnerlu ilinniaqqittariaqarpai. Qanittukkut rollatori atorunnaarpaa, kisianni sivisuumik suli pisussinnaanngilaq. Aamma suliffimminut suli utersinnaanani.
Taqqamigut milittoornermi kingornatigut sapaatit akunneri siulliit 13-it Knud Serritzlev napparsimanersiutisisarpoq suliffeerunnermi ikiorsiissutit pillugit Inatsisartut Inatsisaat nr. 5 malillugu.
Knud Serritzlev pillugu oqaluttuaq tamaat aviisimi Sermitsiami sapaatip-akunnerani matumani saqqummersumi atuaruk, ugguuna akiliillutit iserfigisinnaavat:
