aatsitassarsiorneq

Ataataq ernerlu rubininik tunisaqaqqaartut

Ilaqutariit ingerlatseqatigiiffiat annikitsumi aatsitassarsiortoq - Greenland Minerals & Gems - siullermeerluni rubiniutiminik tunisaqarpoq, ilaatigut tunisaqaqqinnikkut Tasiilami meeqqanut ajunngitsuliornermut tunniussaqartassallutik

Småskalamineselskabet Greenland Minerals & Gem har nu solgt deres første rubiner

Greenland Minerals & Gemsip, ingerlatseqatigiiffik annikitsumik aatsitassarsiornermik ingerlataqartup, ataataasumit erneranillu Lars aamma Angunguak Jepsenimit Nuummeersunit pigineqartup, Danmarkimi kuultinik saffiortumut rubiniutitik siulliit tuneqqammerpaat, tuniseqqinnikkut taakku UNICEF-ip Tasiilami meeqqanut sulineranut tapersiissapput.

Tassami Angunguak aamma Lars Jepsenip kuultinik saffiortumut Nicolai Appelimut ujaqqat siulliit tunivaat, taassuma kalaaleq suleqatini eqqumiitsuliortoq, Buuti Pedersen, peqatigalugu immikkut ittunik sølvimik nannunik kappoqqusiorpoq, rubinimik aamma kuultimik nunatsinneersumik pinnersaaserlugu. Tunisinermi tamatigut iluanaarutit 1.200 koruunit UNICEF By 2018-mut aamma UNICEF-ip Kalaallit Nunaanni sulineranut tapiissutaasassapput.

- Suliniuterput akunerpassuit amerlasuut suliarereerlugu, rubiniutigut siulliit kiisami tunigatsigit nuannerpoq, Greenland Minerals & Gemsimi piginneqataasoq nuannaartoq, Angunguak Jepsen, Sermitsiaq.AG.mut taama oqarpoq.

Atuaruk: Assit takukkit: Aligut aappaluttut angisuut qaqqami nassaarineqartut

3 millionit koruunit ajunngitsuliornermut
Angunguak Jepsen, ujarassiuutut bacheloriusoq aamma aatsitassarsiornermik sammisaqarluni ujarassiuutut Australiami ilinniartoq, annikitsumik aatsitassarsioqatigiiffik maannamut rubininik kusassakkanik 400-nik Nicolai Appelimut tunisisimasoq ilisimatitsivoq, tassungalu ingerlatseqatigiiffik katillugu 2500-nik tunniussaqartussaasoq.

- Nicolai Appelip sølvimik kappoqqusiaq ataaseq 2500 koruunilerlugu tuniniartarniarpaa, taakkunanngalu 1200 koruunit UNICEF-ip Tasiilami sulineranut ilaatigut tapiissuteqartassaaq, Angunguak Jepsen oqarpoq.

Angunguak Jepsenip oqarnera naapertorlugu rubinit 'Nuup eqqaani arlaanni' nassaajupput, taakku suminngaanneerpiarnerat oqaatigerusunngilaa.

Nicolai Appel ilaatigut 2012-imi H.M Dronningip ukiuni 40-nngortorsiornerani niaqorutaasamik Kalaallit Nunaannit tunissutaasumik sanaassinikuuvoq.

Powered by Labrador CMS