Skip to main content

Ataatani ilisaalerpat najuussinnaanngitsoq

Nuummiit nunap sinneranut angalanerit pisariaqartuinnaat ingerlanneqarput, ilisiartornissarlu angalanernut taakkununnga naatsorsuunneqanngilaq.

23-nik ukiullip Elisabeth Petersenip ataatani sapaatip akunnerani siullermi sisamanngornermi tassanngaannartumik annaavaa. Tamanna imminermini ajorluinnarpoq, coronavirusilli tamanna ajornerulersinnarpaa, Sermitsiaq.AG-mut oqaluttuarpoq.

- Atornarluinnarpoq, inuunermalu sinnerani nammattussanngorpara. Nuannaarutigaarali ilisimagakku ilisiartornissamut peqataarusullunga iliuuserisinnaasakka tamaasa misilissimagakkit, oqarpoq.

Nuummiit nunap sinneranut angallanneq oqartussanit pingasunngormat ualikkut matuneqarpoq. Illoqarfiup iluani tuniluuttoqarnera paasineqarmat taama iliortoqarpoq. Inuiaqatigiinnit pinngitsoorneqarsinnaanngitsut pinartullu pissutigalugit suli angalasoqarsinnaavoq. Taamaattoqarneralu paatsuungasitsivoq.

- Allanit saaffigineqarlunga oqarfigitittarpunga pisariaqartuuppat aallarsinnaasunga. Tamanna ersarlussimavoq, inuillu paatsuungapput. Paatsuungavugut, Elisabeth Petersen oqarpoq.

Igasunngorniarluni ilinniarpoq, Ilulissaniillu Nuummut qaammatip ataatsip matuma siorna nuussimalluni. Ataataa sisamanngormat toqummat, ilisiartoqataanissamut, aqagu marlunngornermi pisussamut, peqataajumalluni ilungersorluni angusaqarniarsimagaluarpoq.

Oqartussaniit oqartussanut nuunneqartarneq 

Taanna ilaquttanilu politiit, nunatta nakorsaanera, Attaveqatigiinnermut Naalakkersuisoqarfik Tunillaassortunik Nappaalanersuaqarneranut Ataatsimiititaliarlu attavigisimagaluarpai.  ​​​

Akissutisinissarli imaaliallaannagassaasimanngitsoq, aappaasoq Rune Petersen oqaluttuarpoq.

- Uagutsinnut mamianarnerpaaq tassaavoq arlaannaalluunniit akisussaaffimmik tiguserusunngimmat, oqartussallu akornanni allamut innersuunneqaqattaaginnaratta, oqarpoq.

Elisabeth Petersen Facebookikkut tallimanngormat allagaqarpoq, innuttaasut allat assigalugit paatsuungassutini akissutissarserusullugu, qisuariarfigineqangaatsiarsimavorlu. Facebookikkut allagaa Naalakkersuisut Siulittaasuannit, Kim Kielsenimit qisuariarfigineqarpoq, taanna Tunillaassortunik Nappaalanersuaqarneranut Ataatsimiititaliarsuarmut innersuussivoq. Taakku Elisabethip mailerfigisimavai, nassuiaallugit ilisinissamut peqataanissani qanoq pingaartitsigigini, maannalu akissutisinissani utaqqiinnalerpaa.

Tusagassiortunik katersortitsinermi nunatsinni nakorsaanerup ilisimatitsissutigaa napparsimasut angallanneqarnerat salliutinneqartoq. Ilaqutaasut angalatinnissaannut akuersinissaq tunngavissaqanngilaq.

Akissutiserusuttoq

Elisabeth aappaalu tunillaassortoqalinnginnissaanut iliuutsinut paasinnilluarput, pisumili ilungersunarluinnartumi oqartussanit allanut innersuunneqaqattaarsimaneq oqimaappoq.

- Ersarissumik nalunaartariaqarput, asuli iluatsittoqarnissaanik neriutsitsiinnaratik. Aallaqqaataaniilli ersarissumik nalunaarutigisimappassuk paasisimassagaluarparput, Rune Petersen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER