isumaqatigiinniarnerit

Ataasinngorpat Icelandair suliumajunnaarnermik eqqorneqassaaq

Timmisartut Danmarkimeersut Islandimeersullu qulit angullugit amerlassusillit ataasinngorpat marlunngorpallu Icelandair-imi mekanikerit suliumajunnaarnerannik eqqorneqassapput

Icelandair-imi mekanikerit suliumajunnaarpata ilaasut 12.000-t eqqorneqassapput

Icelandair-imi mekanikerit ataasinngorpat suliumajunnaassapput. Mekanikerit akunnerni 24-ni suliumajunaassapput. Ilaatigut Københavns Lufthavn-imut tassanngalu aallarnerit tikinnerillu arfineq-pingasut, islandip mittarfianit Keflavik-imit aammalu Billundimut tassanngalu aallarnerit marluk eqqorneqassapput.
Marlunngornermi Keflavik-ip Københavnillu akornanni timmisartuussinissat marluk, Islandimit nalunaaqutaq 01.00 Københavnimillu nalunaaqutaq 07.50 taamaatiinnarneqarput.
Islandimi timmisartortitseqatigiiffimmi Icelandairimi timmisartumi mekanikerinik isumaqatigiinniarnerit nutaat ajalusoorsimapput, taamatut allappoq nutaarsiassaqartitsivik Check-In.dk.
Suliumajunnaarneq aallartissaaq ataasinngornermi nalunaaqutaq 06.00-miit, timmisartortitseqatigiiffiullu timmisartuussinissat 65-t taamaatiinnarpai. Ataasinngornermi timmisartuussinerit 12-t ingerlanneqassapput - ilaatigut Keflavik-imiit Københavnimut nalunaaqutaq 01.00 Københavnimiillu utimut nalunaaqtaq 07.50.
– Islandimiut takornariaqarnermut oqartussaasut naatsorsuutigaat ataasinngormat suliumajunnaarnermi ilaasut 12.000-t eqqorneqassasut, nutaarsiassaqartitsivik allappoq.
Suliumajunnaarneq pissaaq angallatileruttornerup nalaani, takornariat amerlasuut timmisartorlutik Islandimut feriartarnerisa nalaani. Suliumajunnaarnikkullu aamma europap avannaamiorpassuit, timmisartortitseqatigiiffimmik USA-mut Canadamullu angalasut eqqorneqassapput.
Icelandairip oqaatigaa ilaasut billetsit utertissinnaagaat imaluunniit siusinnerusukkut kingusinnerusukkulluunniit aallarnissamut allanngortissinnaagaat. Aamma ilaasut timmisartortitseqatigiiffinnut allanut nuunneqarsinnaassapput.
Suliumajunnaarnerli taannaannaassanngilaq. Tassami timmisartumi mekanikerit timmisartortitseqatigiiffillu isumaqatigiissuteqanngippata, suliumajunnaarneq nutaaq sisamanngornermi juunip 19-iani nalunaaqutaq 06.00 aallartissaaq.
Ataasinngorpat suliumajunnaarnissaq killeqartoq sisamanngorpamiit suliumajunnaarnissaq killilerneqarsimanngilaq. Tassa imaappoq, nutaamik isumaqatigiissuteqarnissap tungaanut sulineq uninngatinneqarsinnaavoq.
Icelandair-ip nittartagaani aallarnissat taamaatiinnarneqartut takuneqarsinnaapput. Tamanna peqatigalugu taamaatitsiinnarnerit ilaasunut pisarissersuutaasinnaanerat timmisartortitseqatigiiffiup ajuusaarutigaa.

Powered by Labrador CMS