aningaasaqarneq

Ataasinngorpat atuagassaq pissanganartoq

Aningaasaqarnermut siunnersuisoqatigiit 2014-imut ukiumut nalunaarusiani saqqummiutissavaa, taanna pissangalluni utaqqineqarpoq

Torben Andersen, Økonomisk Råd
Aningaasaqarnermut Siunnersuisoqatigiit siulittaasuat, professor Torben M. Andersen, Aarhus Universitet. Siusinnerusukkut Danmrkimi overvismandi.

Kalaallit Nunaanni Aningaasaqarnermut Siunnersuisoqatigiit siulittaasoqarfiat Nunatsinnukarluni aallarpoq. Ataasinngorpat 2014-imut nalunaarusiaq, pissangalluni utaqqineqartoq, tamanut saqqummiutissavaat. Nalunaarusiakkut paasinarsissaaq Naalakkersuisut aningaasaqarnikkut politikkimi eqqortumut ingerlatsinersut.

Aningaasaqarnermut Siunnersuisoqatigiit siulittaasoqarfimmik arfinilinnik inuttalimmik aqunneqarput. Siulittaasoqarfimmut ilaasortaapput siulittaasoq, siulittaasup tullia ilaasortallu sisamat, tamarmik Naalakkersuisunit toqqarneqartut. Siulittaasuuvoq professor Torben M. Andersen, siulittaasullu tullia tassaavoq pisortaq Ulla Lynge, Sermersooq Business Council-imeersoq. Ilaasortat sisamat tassaapput: Anders Møller Christensen, Nationalbankimi siunnersorti, Anders Blaabjerg, Kalaallit Nunaata Naatsorsueqqissaartarfiani pisortaq, Tønnes Berthesen, KNAPK, aamma Søren Bjerregaard, Økonomi- og Indenrigsministeriami allaffimmi pisortaq.

Siulittaasoqarfiup saniatigut Aningaasaqarnermut Siunnersuisoqatigiinnut ilaasortaatitaqarput kattuffiit soqutigisaqaqatigiit, Naalakkersuisut allattoqarfiat aamma ilisimatusarnermik ingerlatsiviit. Ilaasortat kattuffinneersut ilisimatusarfinneersullu kattuffinnit pineqartunit toqqarneqartarput. Ilaasortat allat Naalakkersuisunit toqqarneqarput.

Kikkut ilaasortaanersut filimi ilanngunneqartumi takukkit. Tamatuma saniatigut 2013-imut nalunaarusiaq qallunaatut kalaallisullu ilanngunneqarpoq.

Nalunaarusiami Aningaasaqarnermut Siunnersuisoqatigiit ilaatigut allapput:

»Anngaasanik aqutsinermi pingaarnertut unammilligassaq tassaavoq siuariariartornerup atugarissaarnerullu nukittorsarnissaannut inuussutissarsiutit ineriartortinnissaannut tunngavissamik pilersitsinissaq. Tamanna pisariaqarpoq inuiaqatigiit siunissamut qulakkeernissaannut aammalu aningaasaqarnikkut imminut napatinnerulernissamut tunngavissamik pilersitsinissamut. Tamatumunnga atatillugu pisortat aningaasaqarnerat qitiusumik inissisimavoq. Maanna inuiaqatigiit pigissaartut aaqqissuussaanerat aningaasaqarnermullu tunngaviat amigartooruteqartarnermik kinguneqarpoq, taamaattumillu ineriartorneq atasinnaanngilaq. Tamanna erseqqissarneqarpoq annertuumik aaqqissuusseqqinnissamik pisariaqartitsinikkut, aningaasaqarneq imminut napatinnerusoq atasinnaanerusorlu qulakkeerniarlugu«

Ataasinngorpat soqutiginartorujussuussaaq takussallugu ineriartorneq eqqortup tungaanut ingerlanersoq.

Powered by Labrador CMS