futsal
Ataasinngornermi marlunngornermilu nunanut allanut unamminerit isiginnaakkit
Kalaallit Nunaata aamma Tjekkiep ikinngutigiittut futsalimi unamminissaat sioqqullugu imminut tatigineq ajoquteqanngilaq
Ikinngutigiittut unammineq siulleq toqqaannartumik uani takuuk.
- Angusagut misilittakkagullu qiviaraanni, Kalaallit Nunaat ajugaaffigilluarsinnaavagut. Kisianni taamatut ikinngutigiittut unamminermiluunniit, soorunami tamaviaarluta anguniagassarput angussavarput.
Tunuarsimasoq
Tjekkiamioq futsalerluni arsartartoq Jiří Novotný taama naliliivoq. Taanna ulluinnarni SK Slavia Praguemi arsartarpoq aammalu 2007-mili nunanut allanut unammisartunngorsivmalluni.
Unamminerit 100-t
Jiří Novotný tamatuma saniatigut nunanut allanut unammisartuni 100-ussaanik unammeqataassaaq, Tjekkiep ataasinngornermi ikinngutigiittut unamminermi Kalaallit Nunaat unammilerpagu.
Jiří Novotnýp ilanngullugu oqaatigaa, nunanut allanut unammisartut nutaat naapinnissaat qilanaaralugu, unamminissarlu sioqqullugu Kalaallit Nunaat nunanut allanut unammisartoqarnersoq ilisimasimanagu.
Ukiut 20-t
Tjekkiemi ukiuni 20-ini futsalertoqartareerpoq, kisiannili timersuut suli nunami tassani nutaajuvoq, Jiří Novotný ilisimatitsivoq,
Unammineq siulleq ataasinngornermi Nunatta nalunaaqutaa malillugu 14:30 pissaaq, unamminerup aappaat marlunngornermi nalunaaqutaq 15:30 pissaaq.
Atuaruk: Futsal-landsholdit toqqarneqartut
EM
Unamminerit Tjekkiep nunanut allanut unamisartuisa Europami pissartanngorniunnernut peqataanissamut piareersarnerannut ilaapput, taanna Serbiemi ingerlanneqassaaq.