Asuli eqqaasut akiliisitaasarnerat Julianep soqutiginartippaa

Singaporemi asuli aqqusinermut eqqaasut akiliisinneqartarput. Soormi tamakkut isumassarsiorfigisinnaanngilagut, Inuit Ataqatigiit sinnerlugit Inatsisartuni ilaasortaq Juliane Henningsen oqallissaarummini allappoq.

Aput aakkiartungajalerpoq. Apuullu peerpat ersarissiumaarpoq eqqaaviit atornagit qanoq eqqaatigisoqarsimanersoq.

Juliane Henningsenip Singaporemi inatsit qimerluuataarsimavaa tassani aqqusinermut eqqaasut 1.400 koruuninik akiliisitaasarmata. Eqqaaginnartut aamma inuiaqatigiinnik sullissisussanngortinneqarsinnaapput.

Eqqarsartaaseq allanngorlugu
- Isumaqarpunga nunat tamat akornanni – soorlu Singapore-mi – cigaretsikut igiinnar-neqarnikut annikillisaavigineqarnerat annertuumik ukkatarineqartoq, tassungalu atatillugu paasisitsiniaanernut tapertariissillugit pineqaatissiisarnerit – tamatumunnga ilagitillugit pillaatitut akiliisitsisarnerit aammalu inuiaqatigiinni sulisitaanerit – pisortanit iluat-sitsilluarfiusumik atorneqartarsimasut. Isumaqarpunga ”periaatsit pitsaanerpaat” (”best practice”) nassaarineqarnissaat anguniarlugu Kalaallit Nunaat nunat tamat akornanni misilittakkanik katersilluarniarsinnaasoq kingornagut nunatsinni illoqarfitta pinngortitattalu nalinginnaasumik eqqiluitsuutinneqarnissaat eqqarsaatigalugu isumassarsiorfittut atorneqarsinnaasunik, Juliane Henningsen oqallissaarummini allappoq.

Taanna isumaqarpoq innuttaasut eqqarsartaasiat allanngortinniarlugu oqallittoqartariaqartoq.

- Upernalermat aput aannialerpoq taavalu tamani tamaani, minnerunngitsumik bussit unittarfiisa, inissiarsuit isaariaasa pisiniarfiillu saavanni qanoq cigaretsikorpas-suaqartiginera ersarinnerulissalluni. Ajoraluartumilli pinngortitami aqquserngillu sinaanni, aappi sumulluunniit nikikkaluarutta tikittakkatsinni, aamma taamaappoq. Upperaara isumaqarpungalu illoqarfitsinni pinngortitamilu eqqiluitsuutitsinissamut isumaqarfiginnin-nitsinnik kingunilimmik allannguinissamik siunertaqartumik paasisitsiniaanissaq ukiua-lunnguit ingerlaneranni naammassisaqarfiusalerumaartoq avatangiisitta eqqiluitsuune-rulernerannik kinguneqartussamik, Juliane Henningsen allappoq.