Assit: Uumasut assigiinngissitaarnerisa illersorneqarnissaat inuusuttunit ujartorneqarpoq
Inuusuttut aaqqissugaannik uumassusillit assigiinngissitaarnerinik isumasioqatigiisitsisoqarpoq kulturikkut illorsuarmi Katuami. Tassani inuusuttut 30-it aamma politikerit peqataapput.
Uumasut assigiinngissitaarneri sorpassuarnik imaqarpoq, tassani uumasut, naasut immami nunamilu uumassusillit eqqartortarneqarlutik. Tassa uumassusillit arlalippassuuppata uumassusillit assigiinngissitaarnerannut iluaqutaanerpaassaaq.
Silaannaap allanngoriartornera Nunatsinni uumasut assigiinngissitaarnerinut eqquisinnaavoq, isumasioqatigiinnermi tamakku ilaatigut eqqartorneqarput.
Ilisimasaqassuseq
Nuiana Hardenberg 20-nik ukioqarpoq, Iluuna Sørensen aamma Kira Lennert Olsen suleqatigalugit isumasioqatigiisitsillutik.
- Sammisaq pillugu ilisimasaqartoqarpallaanngimmat isumasioqatigiisitsivugut. Nunanit allanit Nunarput allaaneruvoq, nunani allani assingusunik isumasioqatigiisitsinerni ajornartorsiutaat uagutsinnit allaanerusarput, taamaammat pingaaruteqarpoq imaattunik isumasioqatigiisitsisarnissat, Nuiana Hardenberg oqarpoq.
Uumassusillit assigiinngissitaarneri inuusuttunit ilisimaneqarnerulernissaat kissaatigaa.
- Ilisimasaqassuseqarnerusoqalerpat taava nunani allani angalanerni oqallisigineqarsinnaasut aamma amerlanerussapput, tassani qanoq inissisimanerput nassuiarneqarsinnaalissalluni. Taamaammat inuusuttorpassuit peqataanerat soqutiginninnerallu nuanneqaaq, oqarpoq.
Nuiana Hardenberg Nuummi 1.G naammassigamiuk Walesimi United World College Atlanticimi atuarnikuuvoq ukiuni marlunni.
- Uumasut assigiinngissitaarneri pillugit tassani soqutigisaqalerpunga, tassani ilaatigut mingutitsisarnerit pillugit paasissutissanik ilinniartinneqarpugut. Iliuutsikka qanoq allanngortissinnaalerlugit eqqumanerulerpunga atuareernerma kingorna, aamma qanoq allanngueqataasinnaanerlunga soqutigisarilerlugu, oqaluttuarpoq.
Assingusunik isumasioqatigiinnernik amigaateqarpoq
Isumasioqatigiinnermi peqataasut Sermitsiaq.AG-mit oqaluunneqarput.
Kristina Munch Larsen. 19-nik ukiulik, 3.G-mi atuartoq:
- Uumasut assigiinngissitaarneri pillugit ilisimasaqarpallaannginnama peqataaniarlunga aalajangerpunga. Sammisaq pillugu ilikkagaqarusullunga aamma inuusuttunik oqalliseqateqarniarlunga peqataavunga. Siornatigut ilisimasimanngisakka pillugit paasisaqarpunga. Sammineqartorli inuiaqatigiinnit soqutigineqarpallaanngilaq, inuiaqatigiimmi ajornartorsiutit allat soqutigineruaat. Pinngortitaq pillugu oqallinnerusariaqarpugut, kinguaagummi aamma maaniittussaapput.
Suliffeqarnermut, Ilisimatusarnermut Avatangiisinullu Naalakkersuisoq Jess Svane:
- Inuusuttut piumassusertik aallaavigalugu uagutsinnut saaffiginninnikuupput, taava nunarsuarmioqatigiit assingusumik oqallinnerat peqataaffigiumallugu isumasioqatigiisitsillutik. Sammisaq soqutiginarpoq, inuusuttut oqalliseqataarusunnertik taamatut ersersippaat. Tuppallernaqaaq inuusuttortagut taamatut saqqummernerat. Pinngortitarput angeqaaq isorartullunilu, uumasunik assigiinngisitaartunik peqarpugut, taamaattumik Nunarsuatsinni ajornartorsiutaaleriartortut uagut Nunatsinnit inuusuttortatta oqalliseqataarusunnerat nuannersorujussuuvoq. Inuusuttortatta maanna atukkagut kingornguttussaavaat, taamaattumik siumut isiginnilluni Nunarput illersorniartutut illugu saqqummernerat nuanneqaaq. Taamaattumik inuusuttut tusarnaarusuppagut.
Inatsisartuni ilaasortaq Aqqalu Jerimiassen (A):
- Aaqqissuussaq isumassarsiatsialaavoq, tassami inuusuttut isiginnittariaasiannit isummat tusaassallugit pingaaruteqarpoq. Isumaat siunissami atorneqalertussaapput, oqariartuutaat tusaagutsigit taava uagut naleqqussaqataasussaavugut isumaannut. Pinngortitamit inuussuteqarpugut, soorlu Ilulissaneerpunga aalisarfissuarmi piniarfissuarmiillu, pinngortitaq qanillugu inuppassuit sulipput. Uumassusillit assigiinngissitaarneri tamatsinnut sunniisarpoq, taamaattumik suut tamarmik ataqatigiipput, soorlu mingutitsisoqassappat eqquinerluttoqartussaavoq. Paasissutissat nutaat aamma inuusuttut isumaat soqutiginarteqaakka.
Lars Salik Kielsen, IA-p Inuusuttaanit, 22-nik ukiulik:
- Pinngortitamut tunngasoq eriagisassaasup sammineqarnera pingaartillugu maani peqataavunga. Ilisimasassanik allanik tuniorarneqarpugut, kiisalu aamma inuusuttut isummersoqatiginissaat pingaartillugit peqataavunga. Aaqqissuussat imaattut pisariaqarput, isumaqarpunga Nunarsuarmioqatigiinni aatsaat taamak pingaaruteqartigilersoq imaattunik oqallittoqarnissaa inuusuttut akornanni. Maanna politikkeriusut inuusuttunit kingoraarneqartussaapput, taamaattumik ilisimasaqarluarnissarput pisariaqarpoq itinerusumik eqqartuisoqassappat. Eqqartorneqartut soorlu appaqarnermut tunngasoq pissarsiaqaatigaara, taakku qanoq Nunatsinnut pingaaruteqartiginerat paasisaqarfigaara, siunissami kinguaassatta nerisariinnarnissaat pingaarpoq. Sulissutigineqartariaqarpoq appat nungunnginnissaat siunnertaralugu.
Aaqqissuisut ilisimatitsipput inuusuttunut gruppiliortoqarnissaa anguniarneqartoq. Tassani uumassusillit assigiinngissitaarneri, aamma Nunat Inoqqaavisa pisinnaatitaaffii pillugit paasissutissiisoqartalernissaa anguniarneqassalluni.