Assit: Ukiunik 60-inik pisoqaassusillit Qeqertarsuarmut tunissutigineqartut
Qeqertarsuarmi innuttaasut utoqqaanerit sapaatip akunnerata tulliani assini 1960-imi assilisani imminnut nassaarinissaminnut iluatsitsisinnaalissapput.
Sapaatip akunnerata tulliani ilaqutariit Blomikkut Qeqertarsuarmut tikippata katersugaasivimmi assinik saqqummersitsineq immikkuullarissoq ammarneqassaaq. Assit qinngortittakkat 50-it missaaniittut digitalinngortinneqarsimapput 20 x 40 centimeterinillu angissusilimmik anillatsinneqarsimallutik.
Kigutilerisup Søren Blomip Aarhusimeersup ukuit 60-it missaat matuma siorna kingullermik Qeqertarsuarmeereerluni pissanganikuulluni tikeqqissavaa. Angajuni arfinilinnik ukiulik angajoqqaanilu Holger aamma Lisa Blom nunap immikkoortuani nakorsaasimasoq peqqissaasuusimasorlu 1960-imi ukioq ataatsimi Qeqertarsuarmeeqatigisimavai.
Ataatama assit katersai
- Ataataga 1984-imi toquvoq. Illumi naqqup-iluaniitsiarninni Qeqertarsuarmi najugaqarallaratta ataatama assilisimasai assit qinngortittakkat naassaaraakka. Isumaqarpunga assit nagguimminnut ingerlaqqissasut. Uattut ukiullit meeraallutik assiminni imminut ilisarisinnaassapput, Søren Blom oqarpoq, ataatamisut anaanamisullu nuliani Aase ernitillu marluk Kalaallit Nunaannukaqatigisimavai.
Søren Blomip katersugaasivimmi pisortamut Linda G. Ostermannimut saaffiginninnini tigulluarneqarsimammat nuannaarutigaa.
- Assinik qinaasinermi digitalinngortitsinermilu suliaq annertusimaqaaq, taamaammat saqqummersitsinerup pingaaruteqarnera allat takusinnaammassuk nuanneqaaq, Søren Blom oqarpoq, saqqummersitsinerlu nammineq akilersugaraa.
Taakani iluaqutaapput
- Pilersaarut tassaavoq assit digitalinngortitat katersugaasivimmut tunniunissaat. Tassunga tunniukkaanni amerlanernut iluaqutaanerussaaq, Søren Blom nassuiaavoq, juulip 23-ani Qeqertarsuarmut tikissaaq. Ullullu tulliani saqqummersitsineq piareersarneqassaaq.