Assit: Saviminilerinermik ilinniarfissaq nutaaq takuuk

Namminersorlutik Oqartussat Sisimiuni Saviminilerinermik Ilinniarfissamik nutaamik kikkut sanaartussanersut aalajangersimavaat. KHR Architecture Nuummi naluttarfimmik Malimmik aamma Hans Lyngep atuarfianik sanasimasut sanaartortussanngorput.

Saviminilerinermi Ilinniarfissaq nutaaq 100-150-inik ilinniartoqarsinnaassaaq kiisalu maskinmesterinngorniartut klassinut marlunnut avitat tamarmik 12-16-inik ukiumi ataatsimi ilinniagaqartassapput. Suliniulli atuarfimmut ataatsimut tunngasuinnaanngilaq, Janina Zerbe KHR Architecturemi suleqataasoq erseqqissaavoq, itisiliillunilu oqarluni:

- Ilinniarfissatut pilersaarutaasut arlallit siullersaraat, Sisimiullu siunissami ilinniartoqarfittut ineriartorneranut aqqutissiueqataassalluni. Taamaammat pingaaruteqarluinnarpoq, ilinniarfissap ilusilersugaaneratigut ilinniarfiit atuutereersut illoqarfiullu imminnut ataqatisiissinneqarnerisigut ilinniarfissap ineriartortinneqarnissaanut pitsaanerpaamik aallaaveqartinneqarnissaa, Janina Zerbe tusagassiorfinnut nalunaaruteqarnermi oqarpoq.

Ilinniarfissaq nutaaq 280 millioner koruuninik akeqartussatut missingerneqarsimasoq, Sisimiuni pisuinnarnut, sikkilertunut qamuteralattunullu aamma qimussinut aqqutissaqartitsissaaq.

- Aqqutissaq atorsinnaatinniarlugu quassuit marluk ilinniarfissamut nutaamut siunissamilu sanaartugassanut atassuserlugit ikaartarfilerneqassaaq. Ikaartarfik ilsimasat aqqutaattut taaguuserparput, ataatsimoortarfiit, soorlu cafe ilinniartoqarfinnilu ataatsimeersuartarfiit ilinniarfiit akornanni imminnut ataqatigiittussaanerat pissutigalugu. Soorunami tamatumunnga peqatigitillugu aqqutissap akornani illut marluk imminnut ataqatigiinnissaat anguniarlugu, Janina Zerbe nassuiaavoq.

Ilinniarfissaq nutaaq sanaartornermut ilinniarfimmut, Aatsitassalerinermik ilinniarfimmut GUX-imullu ataqatigiissillugut ineriartortitsinissamut tunngaviliissaaq. Saviminilerinermik Ilinniarfik atuarfimmi ilinniartunut kiisalu illoqarfimmi suliffeqarfinnut innuttaasunullu ataatsimiittarfittut neriniartarfittullu atuutissaaq, nalunaaruteqarnermi ilisimatitsissutigineqarpoq.

KHR Architecturemit naatsorsuutigineqarpoq, sanasut suliffeqarfiat Verkus pilersuisutut apriilip naanerani isumaqatigiissuteqarfineqassasoq.

Pilersaarutaavoq Saviminilerinermik Ilinniarfissaq 2023-p naanerani suliaralugu naammassineqarsimassasoq.

Powered by Labrador CMS