Assit: Nunaqarfimmi atuarfissaq nutaaq imatut isikkoqassaaq
Nunaqarfik Innaarsuit Upernaviup avannaata tungaani 50 kilometerisut ungasitsigisumiittoq nutaamik atuarfittaassaaq.
Avannaata Kommuniata atuarfissaq nutaaq suliarinnittussarsiuuteqammerpaa. Sanaartorneq 20 millioner koruuninik akeqartussatut missingerneqarsimavoq.
Sanaartornermi pisortap Mogen Holmegårdip Sermitsiaq.AG-mut ilisimatitsissutigaa, atuarfik tunngaviatigut atuartunut 40-niit 45-nut amerlassuseqartunut inissaqartitsisussatut naatsorsorneqarsimasoq, assigiinngitsorpassuarnilli sammisassaqartitsivik inunnut 80-inut inissaqartitsisoq.
Modulikkaartumik sananeqassasoq
Kommunimit neriuutigineqarpoq, sanasut arlaat Kalaallit Nunaanni najugaqarfiit avannarpasinnersaasa ilaanni sanaartorusussuseqassasut. Ilanngullugu neriuutigineqarpoq atuarfiup 2023-mi suliaralugu naammassineqarsimanissaa.
Atuarfik modulikkaarlugu suliarineqassaaq, qitisusut "aqqusineq" klassinut atuarfiusunut assigiinngitsunut, assersuutigalugu fysik/kemimik ilinniarfimmut, sannavimmut pinngortitaleriffimmullu atassuserneqassaaq.
Nunaqarfik Innaasuit 160-it missaannik inoqarpoq.