Assit: Kulturikkut Nersornaat Pipaluk Kreutzmann Jørgensenimut tunniunneqarpoq
Inuiattut ullorsiornitsinnut atatillugu Naalakkersuisut kulturikkut nersornaammi aamma kajumissaammik Pipaluk Kreutzmann Jørgensen aamma Eino Taunajimut tunniussipput.
Ukioq manna Kulturikkut Nersornaat filmiliortartumut ilitsersuisartumullu Pipaluk Kreutmann Jørgensenimut tunniunneqarpoq.
- Inuk filmiliortarnermik soqutigisaqarluarnermigut kalaallit kulturiannik pingaartitsisoq ukioq manna Kulturikkut Nersornaaserneqarpoq. Filmiliorneq uagutsinnut nutaapajaajuvoq. Tamassuma Kalaallit Nunaat pinngortitarlu, oqaluttuarisaaneq, kulturi kinaassuserpullu nunarsuarmi ilisimaneqalersisinnaavai – pineqartoq ukiorpassuarni taamaaliornikuuvoq, tamannalu qujamasuutigaarput tanngassimaarutigalugulu, kultureqarnermut naalakkersuisoq Ane Lone Bagger kajumissaammik tunniussinermini ilaatigut oqarpoq.
Naalakkersuisut kajumissaatitut nersornaasiuttagaallu kajumissutsimik ilitsersuisartumut Eino Taunajikimut tunniunneqarpoq.
- Illoqarfimmini Tasiilami inuusuttut peqatigalugit isiginnaartitsisarnikuuvoq ukiunilu marlunni isiginnaartitsisarnikuulluni. Sammisat soorlu imminut toqunneq, kinguaassiuutitigut kanngutsaatsuliorneq sammisallu oqallinnermik kinguneqartut ammasumik isummerfigalugit nunatsinni nunanilu allani malugineqarnikuuvoq. Inuusuttuuvoq piginnaasalik, oqallitsitsilersartoq inuttullu isummersuisartorujussuulluni – tamanna tunngavigalugu piginnaasamik nangitseqqinnissaanut ineriartortitsinissaanullu kajumissaarneqarpoq, Ane Lone Bagger oqarpoq.
Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.