Assit: Ilisinermi oqaluffik ulikkaartoq

Decembarip aallartinnerani Aalborgip umiarsualiveqarfiani Anders Brøns alianartumik toqukkut qimaguppoq. Inuiaqatigiinnut tupanneq annertuvoq, minnerunngitsumillu Polar Seafoodimik pilersitsisup ilaqutaanut ikinngutaanullu.

Hans Egedep Oqaluffianit ullumikkut ilisaavoq, inunnik Anders Brønsimut, eqqissilluni aamma saqqumivallaarani kalaallinut inuiaqatigiinnut sullissisumut, ataqqinninnerminnik naggataamik takutitsiniartunik ulikkaarpoq.

Ataqqinnittumik aliasunneq

Ilisineq sioqqullugu taassuma ilaqutai qaninnerit isertarfiup eqqaani nikorfallutik misiginneqataassutsinik tigooqqaapput. Ilaasa isaat aappaluttuinnaapput, ilaat toqqissisimanerullutik. Kisianni aliasungaarput. Ataataasup, qatanngutip aamma aataap ilimaginngisamik tassanngaannartumik annaaneqarnerani aliasunneq.

Oqaluffimmi illerfiup eqqaanut inuit naasunik ilioraapput aammalu illerfianut sikilaartarput. Ataqqinninneq annertuvoq, aamma isussunneq tusaaneqarsinnaavoq. Inuit isaannarminnik ilassiorput, nipeqanngitsumillu eqitaarput.

Nina erinarsortoq

Nalunaaqutaq 13.00 organistip Tønnes Kreutzmannip isaatitsissut appippaa, ilaqutaasut isaapput inuillu nikuipput. Tamatuma kingorna tussiut tamanit Ornissinga tamassi appinneqannginnerani erinarsortartup Nina Kreutzmann Jørgensenip ‘’Uummatinni asanninneqarpoq’’ tusarnerluinnartumik erinarsorpaa.

Mãnguak’ Dalager kalaallisut naalagiartitsivoq, tamatumunngalu atatillugu inuup allap pingaarutilik annaagaangagu, tullip asanissaa qanoq pingaartiginersoq oqaatigaa.

Anders ima eqqaamaneqassaaq

Anders Brøns pillugu palasip oqalugiarnermini qanigisaasa qanoq eqqaamassaneraat oqaaseqarfigaa. Kialaartoq aamma oqaluukkuminartoq, asannittoq, nukittooq, quianartoq aamma ilisimasaqartoq. Angut inuunermut aamma inoqamminut ataqqinnittoq.

- Inuunermini angusarpassuaqarpoq, takorluugarpassuanilu piviusunngortippai, Mãnguak Dalager oqalugiarnermini ilaatigut taama oqarpoq.

- Inuunini tamaat timersortartuuvoq, timersortartoqataasalu timersornerup silarsuaanit Anders eqqaamasaqarfigigaat qularnanngilaq, taanna nangilluni oqarpoq.

Ilaqutaasunut tunngatillugu, Anders Brønsip inuunermi eqqaamasassarpassuarnik nassatassaannik qimatsiffigigai oqarpoq.

- Peqatiginiartuarsimavaasi. Nereqatigiinnerni, angalanerni aamma pisuni allani, taanna oqarpoq, Polar Seafoodimiillu allagaq misiginneqataassut atuarlugu naggasiivoq. Andersip suliffimmi tatiginninneq aamma siunnersuutitsialaat tunniussimasai qujamasuutigineqartut allakkami allaqqapput.

Naggammik inuulluaqqusineq

Oqalugiarnerup kingorna Nina Kreutzmann Jørgensen appeqqippoq. Tassani Leonard Cohenip atugaa ‘’Hallelujah’’ erinarsorpaa. Tusarnertumik aamma attortinnartumik erinarsorpaa. Arlallit qulliliorput.

Ataatsimut qinoqatigiittoqarpoq, ‘’Guutiga illimmi’’ aamma naggataagut illerfiup anninneqarnerani ‘’Angerlarfissaqarpoq’’ tussiarneqarpoq. Tassanilu piviusoq takkuppoq, ilaqutaasullu naggammik inuulluaqqusineq artorsaatigigaat takuneqarsinnaavoq. Misigissutsit noqinneqarsinnaanatik qulliit kuupput.