Assit: B-67 aamma N-48 pissartanngorniutivinnermi unammissapput
Isikkamik arsaannermi pissartanngorniunnermi semifinalit arfininngormat unammissutigineqarput. Pissartanngorniullutik unammissapput B-67 aamma Nagdlunguak', bronzinnanniutissappullu NÛK aamma IT-79
Arsaalluni Nunatsinni pissartanngorniuttoqarnerani pissartanngorniutivinnissamut anngunniunnerit, semifinalit, arfininngormat unammissitigineqarput. Pissartanngorniunnerit ulluni makkunani Nuummi unammissutigineqarput.
Semifinalimi siullermi Nagdlunguak' aamma IT-79 unammipput. Minutsini siullerni 45-ni unammigamik unammisuni isertitsisoqanngilaq. Unamminerup immikkoortuata aappaani Nagdlunguak' isertitseqqaartuuvoq, tassani Markus Jensen isertitsisuulluni. Unamminerup naajartuaarnerani Nagdlunguak' isertitseqqippoq, tassani Kunuuteeraq Isaksen isertitsisuulluni.
Unammineq naammassiliivissoq Nagdlunguak' pingasoraartillugu Jan Jensen isertitsivoq. Taamaasilluni Nagdlunguak' pissartanngorniutivinnissamut annguppoq.
Nuummiut unammisut
Semifinalip aappaani NÛK aamma B-67 unammipput. Unamminermi tallimariarluni isertitsisoqarpoq, isertitsinerillu tamarmik immikkoortup aappaani isertinneqarput.
B-67-mi Niklas Thorleifsen unamminermi marloriarluni isertitsivoq, Norsaq Lund Mathæussen aamma Patrick Otiri Frederiksen ataaseraarlutik. NÛK sinnerlugu Morten Lyberth isertitsivoq.
Ullumi sapaammi siulliullutik unammissapput K-33 aamma UB-83, tassani ajugaasoq unammersuaarnermi tallimaattut inississaaq. Unamminerat nalunaaqutaq 13.00 aallartissaaq.
Bronzinnanniullutik unammissapput Nuummiut IT-79 aamma NÛK, unamminerat nalunaaqutaq 15.30 aallartissaaq.
Pissartanngorniutivinneq nalunaaqutaq 18.00 aallartissaaq, tassani B-67 aamma Nagdlunguak' unammissallutik.