urandebat
Assit: Uranimut akerliussutsimik takutitsineq allannguinngilaq
Naalakkersuisut isumartik allanngortinngilaat. Uranimut naaggaarluinnarneq atorunnaartussanngorpoq naak marlunngormi akerliussutsimik takutitsisoqaraluartoq
Akerliussutsiminnik takutitsissut 100-it sinneqalaartut Nuup pueqqornera aporfiginagu marlunngornermi uranimut naaggaarluinnarnerup atorunnaarsinnissaanut akerliullutik ingerlaaqatigiipput. Taamaattoq Naalakkersuisut isumaat allanngunngilaq.
Akerliussutsimik takutitsisut eqqaassutissanit Amisunit aallartillutik Brugsen silaqqussinnarlugu Aqqusinersuakkoorlutik Inatsisartut ataatsimiittarfiata silataanut ingerlaaqatigiipput.
- Nassuiaasoqarnissaa pisariaqartipparput. Nunatsinni Danmarkimilu avissaartuunneqarpoq pissutaasorlu tassaavoq uran, akerliussutsimik takutitsisut suaartarput Inatsisartut ataatsimiittarfiata silataani Naalakkersuisuni ilaasortat tusarnaartut.
Allagartat sungaartut soorlu ’No more Fukushima’ allallu akerliulluni allagartaliaasut Naalakkersuisut isumaannik allanngortitsinngillat. Tassa uranimut naaggaarluinnarsimaneq Inatsisartuni amerlanerussuteqartut atorunnaarsikkaluttuarpaat.
- Kikkut tamarmik iluarisaanneq aalajangerneq ajornakusoorpoq. Kisianni tassa amerlanerussuteqartut tunuliaqutaralugit aalajangertoqartarpoq. Inuiaqatigiinni inissisimaffipput akuersaarneqarsinnaanngilaq. Suliffissaaleqineq annertusiartorpoq pilersugassagullu ullut tamaasa amerliartorput. Taamaammat alloriarnaversaarluni inuiaqatigiit ingerlanneqarsinnaanngillat. Kingulissagut eqqarsaatigalugit alloriartariaqarpugut, Naalakkersuisut siulittaasuat Aleqa Hammond Siumumeersoq akerliussutsimik takutitsisunut oqarpoq.
Akerliussutsimik takutitsisut Inatsisartunilu illuatungiliuttut inuttaasut peqaatinneqarnissaannik ujartuipput.
- Innuttaasut peqataatillugit suliniarluni qineqqusaarsimagaanni tamanna malinneqartariaqarpoq. Kisianni ajoraluartumik oqartariaqarpugut tamanna malillugu sulisoqanngimmat, Inuit Ataqatigiit sinnerlugit Inatsisartuni ilaasortaq Aqqaluaq B. Egede oqarpoq.
Akerliussutsimik takutitsineq naavoq Naalakkersuisuni Inatsisartunilu ilaasortat ataatsimiittarfimmut isaammat ukiaanerani katersorneq nangeqqillugu. Uranimut naaggaarluinnarsimanerup atorunnaarnissaa sisamanngornermi Inatsisartuni oqaluuserineqassaaq.