ataatsimeersuarneq
Assit: Urani qallorneqartariaqanngilaq
Australiameersoq nakorsaq akissarsisinneqarnikorlu Helen Caldicott oqarpoq. Danmark nunarpullu uran pillugu nunarsuarmioqatitsinnut maligassiuisariaqartut isumaqarpoq
- Don't touch it, it's dangerous, people dies in few days, australiameersoq meeqqat nakorsaat Helen Caldicott Kuannersuarni uranitalinnik piiaanissamik pilersaaruteqartoqarneranik aarlerisaarivoq. Ghandip eqqissinissamut nersornaasiuttagaani nersornaammik pissarsinikuuvoq, Christiansborgimilu urani pillugu ataatsimeersuanermi oqalugiartunut ilaalluni.
Avatamit qallunaallu avatangiisit suliniaqatigiiffii pingaasut Noah, VedvarendeEnergi aamma Det Økologiske Råd Christiansborgimi uranitalinnik piiaanissamik ataatsimeersuartitsineq marlunngormat ingerlanneqartoq aaqiissuuppaat. Tassani Narsap eqqaani Kuannersuarni uranitalinnik piiaanissamik pilersaaruteqartoqarnera sammineqangaatsiarpoq.
- Urani uranillu akuutissaa radium ulorianartorujussuupput, qallorneqannginnissaallu uanga siunersuutigissavara. Tassunga tunngassuteqartut attorneqaqqusaanngillat, iioraqqusaanatik imermullu akulerussimaguni imeqqusaanani, Helen Caldicott ataatsimeersuaqataasunut 150-inut oqarpoq. Meeqqat assinginik inunngorlaanik takutitsivoq. Angajoqqaat akuutissanik ulorianartunik sunnerneqarnerisa kingorna meerartaavi sunnernerlunneqarsimasut assini takutinneqarpoq.
- Danmark Kalaallit Nunaallu urani attorneqannginnissaa pillugu nunarsuarmioqatitsinnut maligassiuisariaqarput, Caldicott oqarpoq.
Naaggaarluinarnerup suliarineqarnera sukkasooq
Avatangiisit pillugit ataatsimeersuartitsinermi folketingimi ilaasortat pingasuinnaat peqataapput. Uranimut akiuiniarneq suli anigorneqanngitsoq saamerliunianit oqaatigineqarpoq.
Naaggaarluinnarnerup sukkasuumik Naalakkersuisunit suliarineqarsimanera IA-mit Johan Lund Olsenimit isornartorsiorneqarpoq.
- Innuttaasut annertunerusumik ilisimatinneqanngillat. Urani Narsarmiunut navianaqaaq, folketingimi paarlattaasoq oqarpoq.
Enhedslistenimit Finn Sørensenip oqaatigineqartoq isumaqatigaa.
- Urani pillugu akiuineq aatsaat aallartippoq, Finn Sørensen oqarpoq.
Kikkut suleqatigineqassanersut apeqqutaasoq
Danmark nunarpullu attaveqatigiilluartut Radikale Venstre-mit Christian Friis Bach oqarpoq.
- Danmark Kalaallit Nunaallu uranimik tuniniaassappata isumannaallisaaneq annertunerpaaq atorneqassaaq. Pitsaasumik suleqatigineqarsinnaasunik suleqatissarsiortariaqarpugut, Christian Friis Bach oqarpoq.
De konservative-nit Per Stig Møller ataatsimeersuarnermi peqataasinnaanngitsoq Sermitsiaq.AG-mut oqarpoq Kalaallit Nunaata uranitalinnik tunisassiorsinnaanera periarfissaalluartoq, oqaatigaali uranitalinnik tunisassiorneq nunanut allanut illersornissamullu politikkip ataaniinnera pissutaalluni Danmarki una tunngatillugu akisussaaffik anginerpaaq paarigaa.
- Avatangiisinut tunngasut naaggaarluinnarnerullu allanngortinneqarnera Naalakkersuisunit akisussaaffigineqarpoq. Nunanut allanut- illersornissamullu politikkimut tunngasortaa Danmarkimit akisussaaffigineqarpoq, uranitalinnillu tuniniaanermi aamma tamanna atuulluni. Uranitalinnik tuniniaaneq apeqqummi Kalaallit Nunaat Danmarkilu suleqatigiilluartariaqarput, Per Stig Møller oqarpoq.
Assit ataani takukkit