Assit tammaaneqartut katersugaasivimmi nassaarineqarsimapput
Jim Lyngvildip assiutai Ilulissaniit Nuummut assartorneqarsimasut sapaatip-akunnerani ujarneqareerlutik sapaatiummat nassaarineqarsimapput. Nuup Katersugaasiviani septembarip tungaanut saqqummersitsiffiusussami nassaarineqarsimapput.
Jim Lyngvild assilisani akerleriiffiusut Ilulissaniit Nuummut assartorneqarnerminni "tammarmata" sapaatiummat uippallileraluarpoq. Tamanna Facebookikkut saqqummiussaani takuneqarsinnaavoq.
Nuummi saqqummersitsinissaq pilersaarutit malillugit juunip 19-iani ammarneqassaaq. Maannalu paasinarsivoq ajortoqanngitsoq. RAL imaluunniit Blue Water usiminik naleqaqisunik annaasaqarsimanngillat.
Assit assartorneqarnissaminnut sinaannit peerneqariarlutik immikkut poortorneqarsimapput, assilli tammaaneqarmata sapaatip-akunnera kingulleq tamaat ujaasisoqarsimavoq.
Sumi tamaani ujaasisimasut
Sapaatiummallu tupinnartuliatutullisooq katersugaasivimmi nassaarineqarsimapput.
- Assit nassaarineqarput! Arlaata naukkami katersugaasivimmut inississimavai. Tallimanngormat suut tamarmik ujaasiffigineqarmata nassaarineqarsinnaasimanatik. Ualimulli karsimi plastikkiusumiittut Ilulissaniit nassiussat allat eqqaani nassaarineqarput! Eqqumiippoq Nuannerlunili, Jim Lyngvild assit tamaaneqartut pillugit allappoq.
Nuup katersugaasiviani pisortaq Vinni Birkedal Sermitsiaq.AG-mit ataasinngornerup ullaavani attavigineqarami nuannaaqaaq.
- Assit naassarigatsigit nuanneqaaq, taamaalilluta sapaatiuppat ammaanissatsinnut piaareertussanngorpugut, taanna oqarpoq.
Assit nassaarineqarsinnaanngimmata saqqummersitsinissarlu qanilliartormat pissanganartorsiortoqarsimavoq.
- Qanoq pisoqarsimasinnaanera aamma arlaannit tiguneqarsimasinnaanerat oqaluuserisimavarput, katersugaasivimmi pisortaq illarluni oqarpoq.
Assartoneqarnerminni tammarsimanngitsut
RAL assartukkaminik nalilinnik annaasaqarsimasutut arlalinnit isornartorsiorneqaraluartoq, assit apuuffissaannut anngunneqarsimapput. Nassaariuminaaginnarsimallutik.
- Karsiaqqami naatsorsuutigisatsinnit inikittuaqqamiittut nassaaraavut, tupigusuutigaarali suut tamaasa arlaleriarlugit ujaasiffigigatsigit nassaarisinnaasimannatsigit, sapaatiummalli nassaarineqariasaarput.
Vini assit nassaarineqarmata katersugaasivimmiissimanngilaq, nassaarineqarmatali pisoq quianartutut takusinnaalernerarpaa.
- Nassaarineqarnerat saqqummersitsinissamut pitsaasuussasoq takorloorpara, sapaatip-akunneratami naanerani ammaanersiortoqarpata eqqumaffigineqarnissaa naatsorsuutigaara.
Nuummi saqqummersitsineq sapaammi ualikkut marluniit sisamanut ingerlanneqassaaq, Jim Lyngvild saqqummersitsinermi najuutissaaq. Septembarip qulingata tungaanut saqqummersitsineq ingerlassaaq, tamatumalu kingorna nunami sumiiffinni allani saqqummersitsisoqassalluni. Nunami sumiiffinnut allanut assartuisoqalerpat assit tammaqqinnginnissaat neriuutigiinnarneqarsinnaavoq.