Assit tamataqanngitsut pillugit meeqqat illersuisuat aarlerisaarivoq

Meeqqat illersuisuata Aviâja Egede Lyngep nittartakkami tamataqannginneq ukkatarivaa.

Tassami taassuma inersimasut – angajoqqaat allallu – ajortumik isumaqarani assinik siammarterigaani meeqqamik atisaqanngitsumik, soorlu uffarnerup nalaani imaluuniit innarfissap nalaani assilisat ernumaasutigai.

- Imaangitsoq killissamik qaangiinertut isigigiga, kisiat inoqarpoq assinik taamak ittunik atornerluisinnaasunik, taanna tusagassiuutinut nalunaarummi allappoq.

Eqqarsaqqigit
Taanna isumaqarpoq, inuit tamarmik assinik siammarterusutaminnik siammarterisinnaasut internetimi attaveqaqatigiittarfinni. Kajumissaarivorlu meeqqanik inuusuttunillu assinik siammarterisoqannginnermi eqqarsaatigilluarneqaqqaassasoq.

Aamma erseqqissaatigaa, meerarpassuit inuusuttorpassuillu imminneq assiminnik siammartiterneqarnissaanik assigiingitsunik peqquteqarlutik akuersinikuungillat. Assit filmillu internetimi kaaviiaaleraangat unitsikkuminaassinnaasarput utertikkuminaassinnaallutilluunniit.

Atuaruk: Politiit: Inuusuttut assinik tamataqanngitsunik avitseqatigiittarput

Kingunissat
- Meerarpassuit inuusuttorpassuillu assiminnik filmilianilluunniit qanoq kinguneqarsinnaanera eqqarsaatiginagu internetimi ilanngussisarput, ilaatigut Facebookimi.

- Immaqa imminnut pikkugipput, immaqa ikinngutit akornanni aalajangersimasumik isikkoqartoqassaaq immaqaluunniit nuannariinnarsimasinnaavaat, ilaatigulli avatangiisinit, peeqqaminnit inersimasunilluunniit peqqutaasinnaavoq assinik kinguaassiuutinut tunngasunik ilanngussinermut pissutaasinnaavoq, Aviâja Egede Lynge allappoq.

Atuaruk: Nittartakkami oqaloqatigiittarfinni qinngasaarineq ima akiorneqassaaq

Saqqummeqqissinnaasut
Meeqqat inuusuttullu 18-it sinnerlugit ukiullit internetimi inuillu attaveqaatigisartagaanni allani tamataqanngitsunik assilisanik filminillu ilanngussisut iliuutsitik pissutigalugit unnerluutigineqarneq ajorput, inuilli tamassumunnga meeqqanik inuusuttunillu atornerluisut Kalaallit Nunaanni pinerluttulerineq pillugu inatsit malillugu pineqaatissinneqarsinnaapput.

Assit filmillu nittartakkami ingerlaaleraangamik, unitsinneqarnissaat imaluunniit utertinneqaqqinnissaat ajornarsinnaasarpoq, aamma ukiut arlallit qaangiuttullu saqqummeqqissinnaasarput.

Atuaruk: Meeraanerujartuinnartut inuit attaveqaqatigiittarfiinik atuisalerput

Meeqqat Illersuisuata kajumissaarutigaa inersimasut assinik siammarterinnginnerminni eqqarsaatigilluaqqaartassagaat, siunnersuutigaalu inersimasut meeqqat inuusuttullu tamanna pillugu oqaloqatigiissutigineqassasoq.

- Inuit attaveqaqatigiittarfianni soorlu Facebookimi ilanngussisimaguit ilanngussavit killilernissaanut Facebookimulluunniit nalunaarutiginissaanut periarfissaqarputit. Eqqaamajuk kinaanernik takutinnerit ilinnuinnaq tunngatissagakku kikkullu tamaasa 'ikinngutitut' akuerinagit. Inersimasumut ikioqqugit nalornissuteqaruit, Aviâja Egede Lynge oqarpoq.