Koncert
Assit takukkit: Zednakkut aliannaartitsilaavipput
Ilisarisimaneqarluartunik erinarsortullit Zednakkut tallimanngormat tusarnaartitsimmata inussaaleqinngeqaat
Zedna ukiut 15-nngullartullu nuuteeraq saqqummersikkamikku kiisami ataatsimooqqillutik Nuummi tusarnaartitsipput. Alianaarusuttullimi ikinngimmata isissutissat tallimanngormat ullaap tungaani nungupput.
Ilisarisimaneqarluartut
Nunatsinni erinagissartavut Zednami erinarsortuupput. Nina Kreutzman Jørgensen, Julie Berthelsen, Stinne Fleischer, Tupaarnaq Mathiessen, Katsi Kleist Eriksen Nukâka Coster-Waldaulu ukiut 15-t ataatsimoorsimanatik kiisami erinarsoqatigeeqqillutik aliannaartitsilaavipput.
Erinnat nalunnginneqarluarput
Nuuteeqqap Zedna saqqummersimatsiartoq ingerlaannaq 5000-t tunineqarmata guldinnassutigineqarpoq. Akulikitsumillu radiokkut appisimaaneqartarmata erinnat atorneqartut nalunnginneqarlualerput. Tusarnaartitsinermilu atukkat tamarmik tusarnaartunit erinarsoqataaffigineqartarlutik pikkusuutigineqarput. Qanittumilu nuuteeqqamik saqqummersitseqqammertup Nina Kreutzmann Jørgenseni erinarsormat ersaattaanneqangaatsiarpoq.
Immikkuullarissumik kissassaasoqarput
Tanya Tagaq torlorsortartoq Nunavormiu kissassaasuuvoq. Misigisarlu immikkuullarilluinnartut taaneqarsinnaavoq.
Taassuma appinnginnermini torlorsornermik sooq soqutiginnilersimanerluni nassuiaagami oqarpoq nammineq torlorsoriaatsini naliginnaanngitsoq muteerniusumillu ilaartugaanerarlugu.
Torlorsorluni iliuutsini siornatigut takutinneqarsimanngitsut immikkuullarissumillu misigineqassasut aamma oqaatigaa - tamannalumi ilumoorpoq.
Torlorsornera isiginnaartumit isiginnaartumut misigineqarnera assigiinnginnguatsiarpoq. Nillialluni, illapalaarluni amarrutut miaggoorneri qiiaammernartumik tinguartinnarlutik, alutornarluinnarlutik, pissanganarlutik ersinarput. Misigisaq immikkuullarissoq isiginnittunit qanittukkut puiorallarneqarniarpasinngillat.
Tusarnaartitsineq tamaat isigalugu iluatsilluarpoq. Erinagissorsuit qiimasut nuannisartitsingaatsiarneranit assit ataani takusinnaavatit: