Assit takukkit: Tusassip VR Summer Campertitsinera soqutigineqarluartoq
Tusass julimi pingasoriarluni VR Summer Campertitsivoq inuusuttut Virtuel Reality atorlugu spillimik misiliitikkumallugit aggersaasarluni. Taamaasiortitsineq iluatsilluartutut Tusassimit nalilerneqarpoq, peqataaffissat tamarmik ulikkaaqqasarsimammata.
Meeqqat inuusuttuaqqallu 12-15-it akornanni ukiullit aasaq manna Nuummi Tusassimi VR Summer Campernissamik periarfissinneqarput. VR Summer Camp Tusassimi ilinniartitsineq pillugu siunnersortinit Nivi Thomassen Olsenimit aamma Martin Olesenimit ingerlanneqartoq, pingasoriarluni ingerlanneqarpoq, ullormi ataatsimi peqataasut arfineq-pingasuusinnaallutik. Peqataaffissat tamarmik ulikkaarluinnarsimasut, Tusass tusagassiorfinnut nalunaaruteqarluni ilisimatitsissutigineqarpoq.
- Tusassip meeqqat inuusuttullu IT-mik teknologimillu soqutiginninnerat annertusarusuppaa, siusinaartumillu iliuuseqarnikkut ilinniarusussuseq annertusarsinnaallugu upperalugu. Tusassip piujuartitsinissaq tunngavigalugu suliniutaanni meeqqat inuusuttullu teknologimi nammineq pilersitsisinnaalernissaat anguniagaanut ilaavoq, Tusass allappoq.
- Sammisaqartitsineq nuannerluinnarsimavoq, meeqqallu soqutiginnilluinnartut peqataallutik, Nivi Thomassen Olsen VR-imik ilinniartitsisoq oqarpoq.
Spillit piviusorsiortut
Sammisaqartitsinermi inuusuttuaqqat spillinik VR Oculus Quest 2-miittunik misiliitinneqarput, 3D printerimillu misileraatinneqarlutik. Inuusuttuaqqat ilaat, Daniel Kristiansen marloriarluni peqataavoq.
- Oculus Quest 2-mi spillit assigiinngitsut misilerarneri nuannersimavoq, taamaattumik marloriarlunga peqataavunga, Daniel Kristiansen oqarpoq.
Nivi Thomassen Olsen meeqqat peqataasut nuannisaqaat, Virtuel Realitymillu misiliineq nuannarineqarluarsimavoq.
- Peqataasut amerlanersaasa VR-imik spillertilluni isaruaasat atorneqartartut misilissimanngisaannarpaat, misiliigamillu assut nuannaralugu. Martin uangalu nuannaarpugut meeqqat taama misiliitissinnaagatsigit, Nivi Thomassen Olsen oqarpoq.