se billeder
Assit takukkit Tusariarlinnguumi peqataasoqarluartoq
Erinarsoqatigiit kingumut peqataasoqarluarput
Inuit 350-it sinnerlugit amerlatigisut Danmarkimi piffinnit assigiinngitsuneersut Tusariarlinnguumukaapput.
Ilaat peqataajartorput, allallu erinarsoqatigiinnut qulinut ataasiakkaartunullu aqqanilinnut unammeqataasussatut nalunaarsimasunik tusarnaariarput - Ivalu Judithelu kiisalu nipilersoqatigiit MaTriokkut Aarhusimeersut tusarnaariaatigalugit qitsipput.
- Ulloq unnullu pissanganarluinnartumik uummaarissumik nuannisarfiulluni ingerlanneqarpoq, Kalaallit Peqatigiiffiat Inuit Facebookimi quppernerminni allapput.
Pisarnertut katinngasisaarluni isaanikkut siulittaasullu oqalugiarneratigut aaqqissuussineq aallartinneqarpoq.
Kingornalu unammineq aallartippoq.
Ilaasa nammineq erinarsuusiatik atorpaat allallu kalaallit erinarsuutaannik atuillutik.
Peqataasut tamarmik pikkorilluinnarput, taamaammallu pitsaanerpaanik dommerit toqqaaniarnerat imaannaanngeqaaq. Erinarsoqatigiinnilu nr. 1 aamma 2 1 pointiinnarmik nikingapput.
Nanoq Ikast 126 nr. 3-ngorput
Neriuut Randers 148 pointinnallutik nr. 2-ngorput.
Siornalu ajugaasut Kilitaq Skive 149 pointinnallutik "Kalaaleq nuannaartuuvoq" atorlugu ajugaapput
Solistinissaaq aamma unammisoqavissorpoq:
Ole Lund, Kajak Aarhus 105 pointinnalluni nr. 3-ngorpoq
Jørgen Jeremiassen Ikinngutigiit Aalborgimit ingiallorneqarluni 128 pointinnalluni nr. 2-ngorpoq.
Karl Jensen Lena Madsenilu Upernavimmiut.dk-meersut 140 pointinnallutik "Aqaat - asasamut" atorlugu ajugaapput.