Assit takukkit: Nuuk Plads 20 miiterisut ititigisumi
Københavnimi metrostationit nutaat ilaat Nuuks Pladsimik taaguuserneqarsimavoq. Taanna nunap iluani 20 miiterisut ititigisumiippoq
Nuuk Københavnimi immikkut inissinneqarsimavoq. Tamanna sapaatiummat siuliani Københavnimi metro, illoqarfiup pingaarnersaata ilaani illoqarfiup immikkoortortai imminnut atassuserlugit, citylinjemik allilerneqarmat pivoq.
Stationit taakku ilaat Nuuks Pladsimik taaguuserneqarsimavoq, tamannalu nalaatsornerinnarmik pisimanngilaq, metro-selskabimi tusagassiorfimmi ataqatigiissaarisoq Kåre Møller Madsen oqaluttuarpoq.
- Stationi pilersaarutini siullerni ”Ved Landsarkivet”-imik taaguuserneqarniaraluarpoq, Københavnimili Aqqusinernik atsersuisartut Kalaallit Nunaannut ataqqinninnertik takutikkussimavaat. Stationilu Hans Egedes Gadep aamma Godthåbsvejip akornanniimmat aalajangiunneqarsimavoq, stationi Nørrebrop Frederiksbergillu killinganiittoq Nuuks Pladsimik taaguuserneqassasoq.
Stationi nutaaq Jagtvejip eqqaaniippoq, aamma alutornartumik sanaajuvoq Nuummi bussit unittarfiinut assersuunneqarsinnaanngitsoq. Perrongitai 20 miiterisut ititigisumiipput, nunallu iluaniit nunap qaavanut majuartarfeqarpoq teknikikkut ingerlanneqartunik, iigartaa qernertumik, qasertumik kajortumillu qalipanneqarsimalluni.
Ujaqqat Kalaallit Nunaanneersut atorneqarsimanngitsut
- Aallaqqaammut ujaqqat Kalaallit Nunaanneersut stationimi atorusussimagaluarpavut, tamanna teknik aningaasaqarnerlu eqqarsaatigalugit ajornarsimavoq, Arkitektfirmaet Arupimi titartaasartoq Mille Juul-Sørensen oqaluttuarpoq.
- Qalipaatilli atorsimasavut Kalaallit Nunaani qalipaatinut assiguniartussaapput, titartaasartoq ilulissat pillugit isumassarsianik tamanik avaqqutsisimasoq oqaluttuarpoq.
- Stationi Kalaallit Nunaannut issuaatitut atorusussimanngilarput, københavnimili innuttaasut Kalaallit Nunaannut eqqaanartitassaattut atorusussimallutigu. Nuuk illoqarfiup assitaanut maanna ilanngupparput – københavnimilu najugaqartut maanna namminneq aalajangiiffigissavaat, stationi kalaallinut tunngatitllugu immikkut aaqqissuussanut atorneqartassanersoq, titartaasartoq oqarpoq.
Københavnimi cityringi nutaaq 17-inik stationeqarluni 15,5 kilomiiterisut takitigivoq. 2009-mi sanaartorlugu aallartinneqarpoq 22 milliarder koruuningajalluinnarnillu akeqarsimalluni. Cityringi ullormut 300.000-inik ilaasoqartassasoq naatsorsuutigineqarpoq.