Assit takukkit: Meeqqat ulluanni qalipaatinik nuannanneq
Pisartoq The Color Run, meeqqat ulluanni Nuummi malunnartinneqarpoq, qalipaatigissaartumillu nuannattoqarpoq.
Meeqqat ulluat Nuummi meeqqanut assigiinngitsorpassuarnik sammisassaqarfiuvoq. Arpatsitsineq Qalipaasa, Crossfit Inuanit Kommuneqarfik Sermersooq suleqatigalugu aaqqissuunneqartoq qalipaatiginnersaavoq. Ukiuni kingullerni Color Run nunarsuarmi nuannarineqarluartuuvoq, maannalu Nuummi atugaalerpoq. Arpannermi tassani ungasissutsimut kikkut tamarmik peqataaffigisinnaasaanni 300-t missaanniittut peqataapput.
Qalipaatinik pujoq
Apuuttut siulliit 250-it puussianik qalipaatinik imalinnik pissaqartinneqarput. Taakku majsmelinik qalipaatigissunik qalipaasersukkanik imaqarput. Qajuusat oqitsut siaruarterneqarmata qalipaatilimmik pujuliortitsisoqarpoq. Aallartinneq sioqqutilaarlugu arpattussat qalipaatinik silaannarmut milorussinissaannik kajumissaarneqarput. Tamannalu qalipaatit assigiinngitsut ataatsimut katersuutsinneqarneranik kinguneqarpoq. Arpattut amerlanerit qaqortunik atisalersorsimapput, qalipaatit takuneqarsinnaaniassammata. 1 kilometerimut arpannermi kajumissutsimik peqataasut qajuusanik tigummiarput, taamaalilluni qalipaasersuisoqaqqilluni.
Meeqqanut sammisassarpassuit
Meeqqat ulluanni qalipaatilimmik arpatsitsineq sammisassarpassuit ilagiinnarpaat. Inuusuttut illuanni NUIF-imi tusarnaartitsisoqarpoq, Red Barnetip aamma ikkatiginnittarnerup akiorneqarnissaa ukkataraa. Meeqqat ilaatigut takorluukkaminnik allagartarsualiorsinnaapput, kiinnatik qalipatsillugit aamma ikkatiginnittarnermik akiuniarnermut filmiliaq isiginnaarsinnaallugu. Silataani pissittaarfeqarpoq, trampolineqarpoq aamma sumorluni paasoqarpoq. Nunatta Katersugaasiviani tujuuluaqqanik ilusilersuititsisoqarpoq, katersugaasivimmit isumassarsiortoqarluni aamma Aqipi saqqummersitsivimmi ujarneqarsinnaavoq. Qinngorpumi Brugseni aamma biilit unittarfianni meeqqanut sammisaqartitsivoq.
Periusissiaq eqqarsaatigilluagaanngitsoq
Nuuk Centerimi Pisiffik meeqqat ulluanni aaqqissuisuuvoq. Tassanilu naatsiiat panertut karsiinik qipiterialiortoqarsimavoq, naatsiiat panertunik, kaaginik aamma sikunik qerititassanik akikilliliisimallutik. Tamatuma kingorna Facebookimi taamatut periuseqarneq immaqa eqqarsaatigilluagaavallaanngitsoq oqaatigineqarpoq. Sapaatip-akunnerata siuliani naatitat akikillineqarnerani iluatsitsineq Pisiffiup immaqa ingerlateqqissimasuuguniuk angajoqqaanit taperserneqarnerusimassagaluarput. Tassanilu aamma meeqqat meloninik naatitanillu allanik isseqarluartunik misiliiniarlutik qaleriiaarput.