Assit takukkit: Kofoeds Skolep init nutaat pisortarlu nutaaq nalliussivai
Kaagit nerisassarpassuillu, oqalugiaatit aamma inuit qiimasut Kofoeds Skolep inai nutaat pisortartaarlu tallimanngormat nalliuttorsiutigineqarlutik ilasseqatigiittoqarnerani takussaapput. Assit uani takukkit.
Kofoeds Skolemi atuisut sulisullu tallimanngormat nerisassanik kaaginillu illinnartunik Industrivej 20-mut pulaartorpassuarnut, pisortaq nutaaq inillu nutaat pillugit pilluaqqusiartorlutik takkuttunut piareersaasimapput.
Isumaginninnermut, Suliffeqarnermut, Nunamullu Namminermut Naalakkersuisoq Jess Svane, politiit pisortaat Bjørn Tegner Bay, Naalakkersuisuni siulittaasuusimasoq Lars Emil Johansen aamma kommunalbestyrelsimut ilaasortaq Inga Dora Markussen, nuimasuni pulaartorpassuit ilagaat.
Siulersuisuni siulittaasup Malik Hegelund Olsenip, init nutaat atuartut ilorrisimaarnerinut aamma atuarfiup neqeroorutigisaanut atuinissamut periarfissanut isumaqartorujussuusut, Sermitsiaq.AG-mut oqaluttuaraa.
- Inissaqarnerunera inillu qaamanerunerat iluartorujussuuvoq. Neqeroorutaasut amerlanerunissaannut, atuartunullu neqeroorutit pitsaanerulernissaannut periarfissat amerlapput, Malik Hegelund Olsen oqarpoq.
Atuarfimmik atuisut ilaat ammarneraniilli takkuttalersimasup, init nutaat nuannaarutigeqai.
- Sammisatsinnut ininik amerlanerusunik qaamanerusunik inissaqarnerusunillu peqalerpugut. Tamanna pingaaruteqarpoq, atuisut amerlasuut assassornermik suliaqarluartarmata. Ilaat aamma nipilersortarput, maanna nipilersuutinik peqalerpugut. Ornittakkami ataatsimoorneq iluaqutigisaqaara, Antoenithe Hendriksen, Sermitsiaq.AG-mut taama oqarpoq.
Timersornissamut inissaqartoq
Init nutaat anginerusut kommuni suleqatigalugu pissarsiarineqarput, inissamillu annerusumik pisariaqartitsineq paaseqatigiissutigineqarluarsimavoq, siulersuisuni siulittaasoq oqaluttuarpoq. Initoqqat 480 m2-sut angissuseqarput, inillu nutaat atuartunut sannavittut isersimaarfittullu atorsinnaasaat 840 m2-sut angissuseqartut.
Inissaqarnerulernerani Lions Club Odensemi legatit 53.843 koruunit atornissaannut periarfissaqalersitsipput, taakku timersornermut atortunut atorneqassapput, taakku atuartut namminneq kissaatigisimavaat, atuarfimmi timiminnik atuisinnaaniassagamik.
Atuarfik ukiumut inuit assigiinngitsut 240-280-t missaanniittut atuisartut attaveqarfigisarpaat.
Pisortat uummateqarluartut
Init nutaat saniatigut aamma atuarfiup pisortartaavanut Charlotte Ludvigsenimut iluamik tikilluaqqusisoqarpoq. Oqalugiarnermini kingoraakkani Gujo Thorsteinsson suliarujussuarmut qujaffigaa, taanna atuarfiup 2016-mili ammarneranit annertuumik suliaqarsimavoq. Siulersuisunilu siulittaasup Malik Hegelund Olsen nukiit tassaniissimasut tassaniiginnartussallu nuannaarutigai.
- Gujo kofoeds skolep ilisarnaatigipajaarpaa, aallartinneraniilli peqataanikuugami. Kofoeds Skolemi pingaaruteqartuuvoq. Qujanartumik siunnersortitut suli tamaaniippoq.
- Taamaalilluta ilisimasai, misilittagai attaveqarfigisaalu suli atorsinnaavagut, peqatigisaanillu nutaamik pikkorissumik pisortartaarluta.
Siulersuisuni siulittaasup atorfimmut qinnuteqartut amerlasimasut oqaluttuaraa, kisianni Charlotte Ludvigsenip suliassamut akuersinera nuannaarutigilluinnarlugu oqaatigaa.
- Uummatigissuunera malugisinnaavarput. Pineqartut taakku sullinniaraanni taamaattariaqarpoq. Arfineq-pingasuniit sisamat tungaanut suliffiunngilaq. Suliaq oqimaatsuuvoq, timimut tarnimullu oqimaatsitsisinnaasoq, taamaammat uummateqarluni sulinissaq pingaaruteqarpoq, suliffimmilu taamaattumi ulluinnaat qanoq ingerlannissaannut ilisimasaqarnissaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...