Assit takukkit: Kangerlussuarmi atuartut isumassarsiortut
Kangerlussuarmi atuarfimmi Qinnguata Atuarfiani atuartut ineriartortitassanik isumassarsiaminnik pitsaaneqqisaallutik unammisinneqarput.
Kangerlussuarmi Qinnguata Atuarfiani atuartut nutaaliorluni aallarnisaanerup iluani atuartinneqareernermik kingorna isumassarsiorput, isumassarsiarisatillu Fonden for Entreprenørskab Kalaallit Nunaat Kangerlussuarmi unammisitsinerani saqqummiullugit, Fonden for Entreprenørskab Kalaallit Nunaat tusagassiutinut taama nalunaaruteqarpoq.
Isumassarsiorneq avatangiisit pillugit qorsuunerusumik aaqqissuussinermut, inuiaqatigiinnullu pitsaanerusumik kinguneqartitsisinnaanermut attuumassuteqarput.
- Air Greenland peqqutaalluni Kangerlussuarmi angajullerni ajugaasut aallarnisaanerup iluani unammersuarneq Nuummi Nuuk Centerimi Arsarnerit Inuusuttai – Young Northern Lights” ingerlanneqalerpat peqataassapput. Tamanna aatsaavissuaq piviusunngortinneqarpoq, neriuppugulllu tapiisut amerlatsikkiartorumaartut taamaasiornikkummi nunatsinni sinnattut amerlanerit piviusunngortinneqarsinnaaniassammata, Julie Rademacher Fonden for Entreprenørskab Kalaallit Nunaat immikkoortortami ingerlatsisoq oqarpoq.
Nerisassanik eqqaannginnerunissamik isumassarsisut ajugaasut
Angajullerni ajugaasuupput Line aamma Camilla, taakku 8.klassimi atuarput. Taakkua nerisassanik eqqaasarneq sammisimavaat, sammisartillu aallaavigalugu angerlarsimaffimmi nerisassanik eqqaasarneq annikillisarniarlugu app-iliorsimallutik. App-eq atorlugu nerisassarsiniarnermi suut pisiarineqassanersut nalunaarsorneqarsinnaapput, taamaaliornikkullu angerlarsimaffimmi nerisassat pigeriikkat pisiarinaveersaarneqarsinnaallutik.
Atuartulli tamarmik ineriartortitsineq pillugu sammisaqarnerminni pissarsilluartut, ilinniartitsoq Morten Flø Pallesen isumaqarpoq.
- Atuartut suliniutigisaminnut malinnaalluarsimapput tigusilluarsimallutillu ajornartorsiullu samminiagartik pingaaruteqartillugu. Piffissaq ilinniarfiulluarsimaqaaq ilinniartitsisutullu atuartuutimma namminneerlutik suliaasa saqqummersinneqarnissaat malugilluartussaallugu. Tallimanngornermi unammersuartitsinissamut qilanaarpugutatuartullu ilaat Nuummi nuna tamakkerlugu unammersuartoqalerpat peqataatinneqarnissaat aamma erinigalutigu, oqarpoq.
Aallarnisaanermik unammersuarneq Nuummi decembarip arfernani ingerlanneqassaaq.