Assit takukkit: Juullimut naalagiaqatigiinneq aatsaat taama ornigarneqartigisoq
Aalborgimi kalaallit aamma kalaallinut attuumassuteqartut juulleriartornera malunnartimmassuk domkirke ulikkaaqqavoq.
Ileqqoq malillugu kalaallit Aalborgimi juullimut naalagiaqatigiittarnerat ukioq manna illoqarfiup killinganit Hans Egedes Kirkemit domkirkemut, Budolfimut, illoqarfiup qeqqanut nuunneqarpoq. Tamanna isumassarsiatsialaasoq paasinarsivoq, tassami peqataasut aatsaat taama amerlatigipput, ukiullu siulianut sanilliullutik marloriaatinngorlutik.
Inuit 250-it Budolfip oqaluffianukarput, kalaallit Danmarkimiittut palasiata, Oline Berthelsenip, naalagiartitsineranut tusarnaariarlutik. Soorunami kalaallit juullimut tussiutaat Guuterput naggasiutigineqarmat qulliik kuupput.
Tattoqilluni kaffisorneq
Naalagiartoqarnerata kingorna Folkekirkens Husimi Budolfip eqqannguani kaffeqarlunilu suppeqarpoq. Kalaallit kaffisortitsisarnerattut periutsit tassani atorfissaqartinneqarput, tassami inimi issiaviit 150-iinnaammata. Paarlakaalluni kaffisorlunilu Arctic Street Foodimit aalisagartalinnik suppitortoqarpoq.
Aalborgimi Kalaallit Illuutaanni pisortap, Bo Albrechtsenip, aaqqissuussaq nuannaarutigilluinnarpaa.
- Naalagiarnerup Budolfimut nuunneqarnissaa uagut isumassarsiaraarput. Qujanartumik oqaluffiup tamanna isumaqatigaa. Folkekirkenip illua qanimut suleqatigisarereerparput, taamaammat nuunneqarnissaa ajornarsimanngilaq. Juullerpalaartitsinerup iluatsilluarnera nuannaarutigaarput, pisortaq oqarpoq.
Kaffisortitsisoqarnerata kingorna meeqqat orpiliarlutillu Niisimaaq erinarsorpaat.