Assit takukkit: Jakob Larsen Nykøbing Falsterilu pokalinnattut

Nykøbing Falster Håndbold kusanartumik aamma pisanganartumillu unamminerup kingorna, ajugaasussatut ilimagineqartut Odense Håndbold ajugaaffigaat.

Knud Fl. Larsen Knud Fl. Larsen Knud Fl. Larsen Knud Fl. Larsen Knud Fl. Larsen Knud Fl. Larsen Knud Fl. Larsen Knud Fl. Larsen

Ukiumoortumik Final4-imi pissartanngorniunnermi, juullip ukiortaallu akornanni ulluni marlunni ingerlanneqartartumi Esbjergimi Dokkenimi unammisoqarpoq. Randers HK, Team Esbjerg, Odense Håndbold aamma Nykøbing Falster Håndbold pokalinnanniunnermi kingulliupput.

Semifinalemi siullermi Nykøbing Falster Håndbold 37-18-imik Randers HK-mut ajugaarujussuarpoq. Unamminerup aappaani Odense Håndbold 27-25-imik Team Esbjergimut ajugaavoq. Tassa Odense Håndbold aamma Jakob Larsenip arsartui pissartanngorniutivipput. Odense Håndbold arlalinnik nunanut allanut unammisartoqartoq ajugaasussatut ilimagineqarput.

Nykøbing ajugaasoq

Nykøbing illersuisunit angalaqataasunit 300-it amerlanerusunit illersorneqarluarput. Unammisartut tusaamasaq Kristina ‘’Mulle’’ Kristiansen siuttoralugu arsarluarput. Jakob Larsenip arsaaffiup avataanit qularnaatsumik aqutsivoq. Unammeriaasissaq iluatsinneqarpoq, Nykøbingimilu arsartut unamminerup naammassinissaanut minutsiinnanngortoq ajugaanertik nuannaarutigilereerpaat. Odense Håndboldip ukiumi unammiffiusumi ajorsarnerat siulleq piviusunngorpoq.

Sungiusaasoq tulluusimaartoq

- Tamanna nuanneqaaq. Sukataareerluta maanna ujaminnallutalu pokalinnappugut. Arnat ullumilu takutitsinerput tulluusimaarutigisorujussuuaakka, unamminerup kingorna Jakob Larsen oqarpoq, nangillunilu:

- Odense Håndbold ajugaaffisinnaagunanngikkaluarpagut, aningaasartuutissarpassuaqarlutillu tusaamasartarpassuaqarput. Danskit nunanut allanut unammisartuisa amerlanerpaartaat unammeqataapput. Naak arlaleriarlutik siuaqqanerput angungajattaraluaraat eqqissisimaniaannarluta puullaaqinaveersaarpugut.

- Tamanna uagutsinnut annertuvoq. Nykøbingimut aamma sumiiffimmi Lolland Falsterimi angusaq annertuvoq, sungiusaasoq nutaaq tulluusimaartoq taama oqarpoq, peqataanillu aamma Nykøbing Falster Håndbold sæsonip tulliani Europami pissartanngorniuteqataasussanngortoq oqaatigaa. Pokalinnattut EHF Cupimut peqataassapput.

Odensemi aamma Falsterimi Guldborgsund Kommunemi borgmesterit isiginnaartut akornanniinnerisigut unamminerup pingaassusaanik ilaatigut takutitsipput.

Ilaqutariit

Odense Håndboldip illersuisua Kamilla Kristensen aamma Jakob Larsen ukiuni qulini aappariinnikuupput. Aappariit juullingajalersoq katipput, tassanilu Kristensen Larsenimik taarserneqarpoq. Pokalinnanniunnermi asanninnissamut piffissaqanngilaq. Arsaq unammersuaassutigineqarpoq, minnerunngitsumik Odensip qeqqani illersuisuini, Kamilla Larsen unammisartoqataalu Nykøbingip titarnerup killinganiittua nukittooq Anna Lagerquist ajornartorsiutigaat.

- Qujanartumik immikkoortissinnaavagut, aappariit assiliseqatigiilermata Jakob Larsen taama oqarpoq.

Powered by Labrador CMS