Assit takukkit: Inuiattut ullorsiorneq Københavnimi nalliuttorsiutigineqarpoq
Assiliisartoq Chris Christophersen Københavnimi ualikkut nalliuttorsiortunik assiliivilisarluni malinnaavoq, tassani inuiattut ullorsiornerput kaffisortitsinermik, oqalugiarnernik aamma nipilersortoqarneratigut nalliuttorsiutigineqarpoq
Inuit hunnorujulikkaat sisamanngornermi ualikkut Københavnimi Kalaallit Illuutaannukarput inuiattut ullorsioriartorlutik. Kalaallit Illuutaanni pisortaq Leise Johnsen tikilluaqqusisuuvoq, kingorna peqatigiiffimmit Carsten Siegstad oqalugiarluni.
Ineqarnermut Attaveqaqatigiinnermullu Naalakkersuisoq Simon Simonsen aamma oqalugiarpoq.
Kaagi angisooq takuminartoq ualip nuannerseruttorfiani sassaalliutigineqarpoq, taannalu illup iluani aamma oqallisigineqarluni. Qilaammik pinnersarneqarnera aamma Inuittut ullorsiorneq 2018 allaqqanera maluginiarneqarluarpoq.
Ileqqoq malillugu erinarsoqatigiit MIK tusarnaartitsisuupput, tusarnaartitsinerup kingorna Strøgetimi Caritasbrøndenimut ingerlaaqatigiittoqarpoq, tassanilu tusarnaartitsineq nanginneqarpoq, tamannalu saneqquasunit nuannarineqarpoq.