Assit takukkit: Ilisimatusarnermi umiarsuassaq persuarsiorluni atserneqartoq
Pinngortitaleriffiup ilisimatusarnermi umiasuassaa arfiningornermi Nuummi atserneqarmat oqalugiartoqarlunilu sutugassaqartitsisoqarsimavoq.
Kalaallit Nunaanni ilisimatusarnermi umiarsuaq nutaaq, Tarajoq arfininngornermi pisortatigoortumik atserneqarpoq, atsiisoqarneranut politikkerit, innuttaasut ilisimatusarnermilu umiarsuup nutaap "ilaqutai" Pinngortitaleriffimmeersut peqataapput.
Ilisimatusarnermi umiasuaq 61 meterisut takitigisoq 235 millioner koruuninik akeqarsimavoq, Kalallillu Nunaanni ilisimatusarnermut aatsaat taamak annertutigisunik aningaasaliissuteqartoqarsimalluni.
Umiarsuaq teknologiikkut nutaaliaanerpaanik atortoqarpoq, atortullu taakku imaani uumassusilinnik ilisimatusarnissamut itisuupilussuarmilu ilisimatusarnissamut periarfissiipput.
Aningaasaqarnermut Naligiissitaanermullu Naalakkersuisoq Naaja Nathanielsen (IA) atsiisoqarmat imatut oqaaseqarpoq:
- Nunarput ilisimatuussutsikkut misissuutissamik ullumi pisuunnguallappoq. Inuiaqatigiit ilisimatuussutsikkut misissuutissamut 220 millioner koruuninik aningaasaliissuteqarput, Aage V. Jensenillu Aningaasaateqarfii tukkoqalutik umiarsuup atortorissaarutissaanut 15 millioner koruuninik tunissuteqarlutik. Taakkunngalu qujarujussuarusuppugut. Umiarsuarmut aningaasaliissutaasut inuiaqatigiinnut arlalitsigut, ukiorpassuarnilu tulliuttuni iluanaarutaalersussaapput. Tarajoq Issittup imartaani silallu pissusianik ilisimatusarnermi toqqammaviusussaavoq, taamaalillunilu, Kalaallit Nunaanniinnaanngitsoq, aammali nunarsuup sinnerani ilisimaligassanut iluaqutaasussaalluni, naalakkersuisoq ilaatigut oqarpoq.