Assit takukkit: Corona Nuummi misigineqartoq
Namminersorlutik Oqartussat neriniartarfiit, timersornerit Nuummiillu aallarnissat matullugit nalunaaruteqarmata, Nuummi innuttaasut qanermut assiaqusersupallallutillu misissortikkiartorrassimapput. Nunatta Nakorsaanerata misissuisussat naammattut neriorsuutigaa.
Nuummi kingullertigut tunillatsittoqarsimasoq pillugu Naalakkersuisut tallimanngornermi nalunaaruteqarmata, qanermut assiaqutinik pissarsiniartoqapallassimavoq. Tusagassiortunik katersortitsineq suli naammassinngittorli, inuit kiinnaminnut tungujortunik assiaqutillit aqqusinermi takussaalersimapput.
Tusagassiortunik katersortitsineq naammasineqarsimatsiaannartoq illoqarfiup qeqqani misissuisarfiup silataani tulleriiaartut amerliartupallassimapput. Piffissap sivikitsuinnaap iluani inuit 100-t angullugit amerlassusillit aqqusineq angullugu takuneqarsinnaavoq.
Tusagassiortunik katersortitsinermi inuit arfininngornermi Herrefordimiissimasut, Skylinemiissimasut Daddyssimiissimasullu tamarmik coronamut misissortikkiartoqquneqarput. Tamatumunnga pissutaavoq tunillatsissimasup kingulliup arfininngormat summiiffinni taakkunaniissimanera.
Nunatta Nakorsaanerata oqaatigaa, inuppassuit misissuisarfimmit misissorneqarsinnaanerat ajornartorsiutaanngitsoq.
- Misissueqqittarnissamut aaqqissuussarput ajunngilluinnartumik ingerlavoq. Maanna pisoq immikkut illuinnartumik pisuuvoq, tassani inuit qaqugu qanorlu amerlatigisut aggerlutik misissortissinnaanerannut pilersaarusioqqaarsinnaasimanngilagut, tamannali ajornartorsiutaanngilaq, Henrik L. Hansen Sermitsiaq.AG-mut oqarpoq.
Misissuisarfimmi inuit 90-it angullugit nalunaaquttap akunneranut misissorneqarsinnaapput.
Immissinnut paaralusi
Pisiffimmit inuppassuaqartoq nalunaarutigineqarpoq, pisiniartutillu allanut eqqarsaatiginnissasut piumaffigisarsimavaat.
- Pisiniartartuvut pisiniarfiutitsinnut niuerniarnerminni qanermut assiaquteqartarnissaannik qinnuigissavavut. Maannakkorpiaq pisiniartiutitsinnut ataatsikkut pisiniartorpassuaqarpoq.
Pisiffimmit pisiniarfiit ammaffii tamakkerlugit atorluarneqassasut kiisalu ilaquttat angerlarsimatillugit kisimiilluni pisiniartoqartarnissaa pisiniartartunut kaammattuutigineqarpoq.
- Tamatuma saniatigut pisiniartartuvut qinnuigissavavut, pisiniarfimmut isertinnatik assatik spritsertassagaat. Pisiniartartutta imminnut sulisunullu naammagittarnermik takutitsisarnerat nuannaarutigaarput, Pisiffimmit oqaatigineqarpoq.
Atuarfiit, meeqqeriviit utoqqaallu illuat
Kommuneqarfik Sermersuumit ilisimatitsissutigineqarpoq, meeqqeriviit atuarfiillu ammatikkallarneqartut.
- Nuummi coronamik napparsimasoqarnera pillugu Corona pillugu allatseqarfimmiit malinnaaffigeqqissaarneqarpoq, maannakkuugallartumillu Kommuneqarfik Sermersuumi atuarfiit meeqqeriviillu nalinginnaasumik ammaannassapput.
Kommunimit kaammattuutigineqarpoq, innuttaasut kommunip nittartagaatigut aammalu tusagassiutitigut malinnaalluassasut, allanngortoqariasaartoqarsinnaammat.
Nuummi utoqqaat angerlarsimaffisa pulaarneqartarnertik killilersorusuppaat, naak utoqqaat illuini najugaqartut sulisullu akiuussutissalertereernikuugaluartut. Pulaartukinnerunissamik kissaateqartoqarpoq, utoqqaat illuini tuniluuttoqarsinnaanera ernumanarpallaanngikkaluartoq, immikkut mianersornissaq tunngavigalugu, kommunimit ilisimatitsissutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...