Assit takukkit: Atuartut Tasiilameersut Prinsesse Benediktimut pulaartut
Ileqqusoq malillugu Tasiilami atuartut paarlaasseqatigiillutik Danmarkimiinnerminni prinsesse Benediktimit Amalineborgimut qaaqquneqarput
Atuartut 23-t Tasiilameersut prinsesse Benedikte ullumi pulaarpaat. Atuartut paarlaasseqatigiillutik Danmarkimiipput, Gentofte Kommunemipput, danskini angajoqqaarsiaminni najugarlutik. Atuartut kusanartunik atikkersorsimapput, kjoleqarlutik, ilupaaqarlutik tunumiutullu kalaallisoorlutik.
- Kalaallit Nunaanni Danmarkimilu atuartut 54-it Amalienborgimi ataatimuualaarnissamut ullumi qaaqquneqarsimapput, tassani H.K.H Prinsesse Benedikte mamakujullerlunilu saftillerluni tikilluaqqusivoq, Danmarkimi kunngikkormiut facebookiminni allapput.
Assini takuneqarsinnaavoq, prinsesse Benedikte atuartut tamaasa assammillugit tikilluaqqugai, aamma atuartut Tasiilami Alivarpimmeersut erinarsorlutillu nipilersorput.
Ileqqoq
Prinsesse Benediktep kalaallinik atuartunik qaaqqusisarnera 1991-imi aallartippoq, taamani prinsesse Gentofte Grønlands Komitérisimasaani atorunnaarsimasumi illersuisuusimavoq.
Ukioq manna qaaqqusisumut tunniunneqarpoq puisip amianik assammik taskeliaq, taskip imarai aaqqateeqqat kameeqqallu puisit amiinik aamma sanaajusut.
Prinsesse Benedikte Tasiilamut siorna tikeraarsimavoq, ukiorpassuarnilu Tasiilami meeqqat pillugit pimoorussilluni suliaqartarsimalluni. Tasiilami atuartut ukiut tamaasa angerlarsimaffimminut qaaqqusarpai.