Angutit isikkamik arsarlutik unammisartut sungiusaasuannik sungiusarneqarnermik misigisaqartartut amerlanngillat. Ittoqqortoormiini meeqqat atuarfianni atuartut arfineq-pingasut Danmarkimiinnerminni tamanna misigisaqarfigaat.

Atuartut ilisimasassarsiorlutik angalanerminni angutit nunanut allanut unammisartut sungiusaasuat naapillugu isikkamik arsarneq sungiusarnerlu paasisaqarfigerusussimavaat.

Ittoqqortoormiini Ejnar Mikkelsenip atuarfiani atuartut arsarnissaminnut periarfissinneqarput, unammisartullu sungiusaasuat Morten Rutkjær sungiusartarneq pillugu oqaloqatigalugu. KAK taama allappoq.

- Nuannaarutigalugulu tulluusimaarutigeqaara periarfissaq atorluarlugu meeqqanut tunniussaqarsinnaanera. Meeqqat atuarfianni atuartut Danmarkimi pulaarmannga taamaalillungalu sungiusarsinnaagakkit tulluusimaarutigeqaara. Meeqqat nuannaartut arsaattarfimmi sukataarluataavipput, Morten Rutkjær oqarpoq.

Atisanik timersuutinik angerlaassisut

KAK-p aamma sungiusaasup Morten Rutkjærip atuartut tikeraarnissaat pilersaarutaasoq sioqqullugu najukkami suliffeqarfiit oqaloqatigisimavaat. Taamaalilluni sungiusaasoq atuartunut atisanik timersuutinik arsaatinillu tunissuteqarsinnaasimavoq. Atuartut tunissutigineqartut nuannaarutigigaat sungiusaasoq oqaluttuarpoq, meeqqallu isikkamik arsarnermi piumassuseqarnerat piginnaasaallu pitsaanerarpai.

- Nunanut allanut unammisartut ajunnginnerpaamik sunniuteqarluaqataanissaq pingaartitaraat, soorunami aamma uanga sungiusaasutut tamanna pingaartippara sulissutigiuarlugulu. Meeqqat inuusuttullu timersornikkut ajunnginnerpaamik sunniuteqaqataaffigerusuppagut, taamaaliornitsigut nuannersumik inuuneqarnissaannut aqqutissiuusseqataarusukkatta, Morten Rutkjær oqarpoq.

Sungiusarnermit assit allaaserisap qulaani takusinnaavatit.