Assit takukkit: Assammik arsarnermi suna tamarmi sukkasuupilussuarmik pisarpoq
Nunanut allanut unammisartoq Lykke Frank Hansen Kalaallit Nunaannit sivisuupilussuarmik angalareernermi ulloq unnuarlu qaangiutinngitsoq Nykøbing Falster sinnerlugu unammeqqippoq
Lykke Frank Hansen pingasunngormat Nuummit, Island aqqusaarlugu aallarpoq. Kangerlussuakkoorluni nalinginnaasumik aallartussanut inissaqarsimanngilaq. Islandimi unnuisimavoq. Københavnimut sisamanngormat tikippoq.
Biilerluni Nykøbing Falsterimukarpoq inigisassaminullu inissinneqarluni. Tallimanngormat ullup qeqqata siorna angalaqqilerpoq. Unammisartoqatini peqatigalugit Randersimut nalunaaquttap akunnerini tallimani busserpoq. Tassa assammik arsartarnermi arsaaffiinnarmi sukkasuumik ingerlasoqarneq ajorpoq. Arsaaffiup avataani aamma taamak sukkatigisumik pisoqartarpoq.
Maanna misilinneqassaaq
Lykke Frank Hansenip Danmarkimiinnerminut atatillugu isumagisassat assigiinngitsut isumaginiarlugit Nuummut uteqqinnginnermini, Nykøbing Falster Håndboldimi assammik arsartartut peqatigalugit marloriarluni unammeqataavoq.
- Unammilligassaq manna misilinneqartariaqalerpoq, soorunami neriuutigaara iluatsilluarumaartoq, Lykke Frank Hansen oqaluttuarpoq.
- Nalunngilara siulliullunga unammisinneqartussaananga. Neriuutigaara unamminerup ingerlanerani isertinneqarumaarlunga arlalialunnillu isertitsiumaarlunga. Piffissami aggersumi unammisartoqatikkalu sungiusangaatsiartussaavugut. Unammeriaatsimut malinnaalerusuppuga, minnerunngitsumillu arpariaatsinik assigiinngitsunik ilikkagaqarusullunga. Assammik arsartartut pitsaanerit naligilernissaannik takorluukkama misilinnissaa qilanaarisupilussuuara.
Nuannerluinnartumik tikilluaqqusaaneq
- Nykøbing Falster Håndbordip sunik tamanik isumaginnissimanera qujamasuutigeqaara. Tassani unammisartut tamarmik inussiarneqaat. Aamma illersuisartut arsartartunut malinnaasartut tamarmik. Piffissamut aggersumut qilanaarpunga, Lykke Frank Hansen naggassiilluni oqarpoq.
Unamminermi ajorsaqqinneq
Ukiumi unammisarnerit aallartinnerat, maannamut Nykøbing Falster Håndboldimut iluatsitsiffiusimanngilaq. Taalimanngormat unnukkut Randersimi 32-27-mik ajorsarneq unammisartoqatigiit neriuutigisimasaasa ilaginngikkaluarpaat. Lykke Frank Hansen 2. halvlegimi minutsit arfineq-marluk ingerlareersut siullermeerluni isertinneqarpoq. ataasiarluni isertitsivoq.
Maannamut unamminerni sisamani pingasoriarlutik ajorsarsimapput. Unammisartut pitsaanerpaat ilaasa arfinillit ajoqusersimanerisa kingunerannik unammilluarsinnaasut ikilisimapput.
GSS-imit iluatsitsilluaqqusineq
GSS-imi siulittaasup Kristian Heilmannip tusagassiorfinnut nalunaaruteqarnermini Lykke iluatsitsilluarnissaanik kissaappaa, ilaatigullu oqaatigalugu:
- GSS-imi Assammik arsartartut siulersuisuisa nuannaarutigisupilussuuaat, Lykkep piginnaasaminik pitsaanerpaat akornanni takutitsisinnaanngornera. Piginnaasai meeraallunili assammik arsartarnerani aallartissimapput, taamani Rita Egede sungiusaasoralugu. Ineriartorneq uninngisaannarpoq, maannalu Lykkep periarfissamik tigusinissamut kisimi isumaginnissinnaavoq.
Marlunngorpat unnukkut unammeqqinnissaq tullinnguuppoq
Lykke Frank Hansen unammisartoqatinilu marlunngorpat unnukkut unammeqqissapput, angerlarsimaffimminni Nykøbingimi Final fourimut anngunniullutik København Håndbold pokalinnanniullutik unammissavaat. Nykøbing Falster Håndbold pokalmesteriupput, tamanna anguniaqqillugu tamaviaartussaapput.
