Assit takukkit: Alluitsup Paa nutaamik atuarfittaarpoq
Alluitsup Paani meeqqat atuarfiat nutaaq sanatitsisuniit, Namminersorlutik Oqartussanit, Kommune Kujallermi borgmesterimut Kista P. Isaksenimut persuarsiutigineqarluni tunniunneqarpoq.
Pingasunngorneq martsip 13-at 2019 Alluitsup Paani meeqqat atuarfianni atuartunut immikkuullarilluinnartuuvoq. Nunaqarfimmimi meeqqat atuarfianni atuartut 17-iusut ulloq taanna nutaamik atuarfittaarput.
Atuarfik nutaaq kommunip borgmesterianut, Kista P. Isaksenimut (S) Namminersorlutik Oqartussanit pingasunngornermi ullaakkut nalunaaqutaq qulinut tunniunneqartoq, Kommune Kujalleq tusagassiutinut nalunaaruteqarluni allappoq.
Atuarfittaaq pisortatigoortumik tunniunneqareermat nunaqarfimmi innuttaasut atuarfimmut kaffesoriaqquneqarput.
Oquk
Atuarfik nutaanngilisimasoq ukiuni arlalinni oquiarlugu salinneqartarsimagaluarpoq iluatsinngitsumilli, atuarfillu kommunip 2012-imi matusariaqarsimagaa, Kommune Kujalleq tusagassiutinut nalunaarummini ilisimatitsivoq.
Ukiullu arlallit utaqqereerlutik, kiisami nunaqarfimmi innuttaasut nutaaliamik, atortullu pisariaqartinneqartut ilaatereerlugit, atuarfittaartinneqarput.
- Nutaamik atuarfeqalernermi meerartatta pitsaasumik atugassaqalerlutik atuarnerminnik aallussilluarnissaat
neriuutigalugu isumalluarfigaarput, kommuni tusagassiutinut nalunaarummini allappoq.