Assit takukkit: Allagartaq isikkiviginnerpaamiittoq
Aasivissuit - Nipisat, UNESCOp nunarsuarmioqatigiit kingornussassaannut allattorsimaffiutaani siorna juunimi ilanngunneqartoq, paasissutissartalinnik allagatalersorneqalerpoq.
Nunarsuarmioqatigiit kingornussassaat Aasivissuit – Nipisat isikkiviginnerpaami allagartalersuisimanini tulluusimaarutigisinnaavaa.
Qeqqata Kommuniani Aasivissuit – Nipisanni Site manager, Paninnguaq Fleischer-Lyberth tusagassiutinut nalunaarummi taama allappoq.
Aasivissuit – Nipisat UNESCOp nunarsuarmioqatigiit kingornussassaannut allattorsimaffiutaani juunimi 2018-imi ilanngunneqarpoq. Sumiiffillu annertoorujussuummat kulturikkut kingornussassamik ingerlatitseqqiinissamut periusissatut pilersaarummik annertuumik pisariaqartitsivoq, taamaalilluni nunarsuarmioqatigiinnut kingornussassanut atassuteqarnera takuneqarsinnaassusaalu kiisalu siunissami ineriartortinneqarnissaanut annertunerusumik oqaluttuarineqarsinnaanera qulakkeerneqarluni, Paninnguaq Fleischer-Lyberth tusagassiutinut nalunaarummi allappoq.
Paasissutissiineq pisariaqartoq
Takornarianik sullissisut kissaataat malillugu Qeqqata Kommunia sumiiffimmi allagartalersuissalluni aalajangerpoq. Allagartami atuarneqarsinnaapput nunarsuarmioqatigiit kingornussassaat pillugu paasissutissat, allagartarlu Aasivissuit – Nipisat-nut takornariartut, ukiumut 15.000-iusartut, atuarsinnaavaat.
- UNESCOp Nunarsuarmioqatigiinnut kingornussassarititaannut qaqugukkut apuuttoqartarnersoq siusinnerusukkut paasineqariaannaasimanngilaq. Taamaammat allagartarsuaqalerneq uagutsinnut isumaqartorujussuuvoq, taassumammi takutippaa Nunarsuarmioqatigiit kingornussassaannut apuuttugut, Francisca Davidsen Olsen, Aasivissuit – Nipisat-ni nakkutilliisoq oqarpoq.
Qeqqata Kommuniata ilisimatitsissutigaa Sisimiuni Kangerlussuarmilu, kiisalu nunaqarfimmi Sarfannguani, maanna nunarsuarmioqatigiit kingornussassaanni inissisimasumiittumi, paasissutissartalinnik allagartalersuisoqassasoq.
- Takorloorneqarpoq ingerlatitseqqiiniarluni illersuiniarlunilu suliniutaagallartut ukiuni aggersuni annertunerumik ineriartortitsinissamut aammalu ataqatigiinnerusumik ingerlatitseqqiinissamik suliniutissanut aallarniutitut atorneqassasut, allassimavoq.
Sumiiffiup sineriaani ukioq manna takornariaqarfiusussani aqquteeraliortoqassaaq paasissutissartalinnillu allagartarsualersuisoqassalluni. Taama isiortoqarnerata sumiiffiup aserfallatsaaliorneqarnissaa anguniarneqarpoq.