Assit takukkit: Akamalik putoqalertoq
Kilisaatit marluk arfininngornermi Maniitsup kujataani aporsimasut tamarmik ajoqusingaatsiarsimasut assitigut takuneqarsinnaavoq. Imarsiornermik qullersaqarfiup umiarsuit ataasinngornermi misissorpai, ajutoortoqarneranillu misissueqqissaarneq aallartinneqarpoq.
Imarsiornermik qullersaqarfiup kilisaatit taakku marluk sapaatip-akunnerata naanerani aporsimasut ataasinngornermi misissussavai. Imarsiornermik qullersaqarfiup misissuisarnermut pisortaa, Martin John, Sermitsiaq.AG-mut taama oqaluttuarpoq.
- Imarsiornermik qullersaqarfiup siullermik umiarsuit tigummigallarpai, ajoqusernerisa iluarsinnginneranni angalaqqinnginnissaat qulakkeerniarlugu, taamaalilluni ajoqusertoqaqqissanngimmat imaluunniit avatangiisinut sunniuteqartoqassanngimmat.
Kilisaatit taakku marluk arfininngornermi Maniitsup kujataatungaani apornerannut suna pissutaanersoq suli qulaajarneqanngilaq.
Ajutoortoqarneranik misissueqqissaartut utaqqigaat
Pisoq maanna Imarsiornermik ajutoortoqarneranik misissueqqissaartartut misissuiffigaat, taanna immikkoortoq attuumassuteqanngitsuuvoq, tamatumalu kingorna Imarsiornermik Aqutsisoqarfiup ataatsimoortumik nalilersuissaaq, inatsisinik unioqqutitsisoqarsimanersoq, taamaassimassappallu politiinut nalunaarutiginnittoqassanersoq nalilerneqassalluni.
- Tamatuma pinerata nalaani kilisaatit suut suliarisimaneraat misissorneqassaaq, imarsiornermilu nunani tamalaani inatsisit malillugit sorleq sangusussaasimanersoq, iluamik nakkutiginnittoqarsimanersoq aamma sangunissamut periarfissamik unammillernartoqartitsisumik teknikkikkut ajoquteqartoqarsimanersoq, Martin John oqaluttuarpoq.
Misissuinermi AIS-imit (Automatic Identification System) paasissutissat ilaatinneqarput, tassani piffissami aalajangersimasumi umiarsuit sumi inissisimanersoq takuneqarsinnaavoq. Marinetrafficimit paasissutissat malillugit aportut saniatigut kilisaatit arlallit sumiiffimmi ataatsimi aportoqarnerata nalaani aalisarsimasut takuneqarsinnaavoq.
Umiarsuit taakku assingi malillugit, Polar Nataarnaq siumigut ajoqusersimavoq, Akamalik sinaatungimigut ajoqusersimasoq. Minnerpaamik umiarsuup initaa ataaseq ajoquserluinnarsimasoq, aamma perusuersartarfik Akamaliup natianik katassimasoq, Facebookimi assinit takuneqarsinnaavoq.
Angalaqqissinnaanersut nalilissagaat
Polar Seafoodimi siulersuisuni siulittaasoq, Henrik Leth, pisoq pillugu suli annerusumik oqaaseqarsinnaanngilaq.
- Imarsiornermik aqutsisoqarfiup aamma ajutoortoqarnerani misissueqqissaartartut suliamik misissuitinnagit oqaaseqarsinnaanngilanga, taamaammat qanoq oqaasissaqarnersut takujumaarparput. Maannamut inunnik ajoqusertoqarsimannginnera nuannaarutigiinnarparput.
Siullermik kilisaatit ajoqusersimatillutik amutsivimmut misissorneqarnissamit tulliata tungaanut angalaqqissinnaanersut, imaluunniit toqqaannartumik Nuummit amutsivimmut toqqaannartunik angallanneqassanersut nalilersorneqassaaq.
- Taamaattoqassappat kilisaaterput qaammat ataaseq tikillugu sivisussusilimmik ingerlanneqarnera unitsittariaqassavarput, Islandimi imaluunniit Danmarkimi amutsivimmut angallanneqartariaqassammat.
Royal Greenlandimi maanna ajutoortoqarnerani misissueqqissaartartut misissuinerat utaqqineqarpoq, tamatuma kingorna aatsaat suliaq pillugu oqaaseqarniarput.