Assit takukkit: Aalborgimi Nanook aamma puisit siatat
Aaqqissuussamit aamma tusarnaartitsinermit assit takukkti
Aalborgimi Studenterhusetimi tallimanngornermi kalaalerpaluttumik aaqqissuussisoqarpoq. Inersuarmi nipilersortarfiusumi tusarnaariat kalaaliunerusut Nanookikkut rockertut tusarnaarpaat, silataanilu inuusuttut Kalaallit Illuutaanneersut puisip neqaanik aamma suppinik agguaapput.
Nanook maanna sivikitsumik Danmarkimi tusarnaartitseqattaarluni angalavoq, Odensemi, Aalborgimi aamma Københavnimilu Rikka kujataamiu erinnanik Ole Kristiansenip atugaanik isumassarsiorfiginnittoq peqatigalugu. Aalborgimi tallimanngornermi tusarnaartitsisoqarnerani 200-t missaanniittunit tusarnaartoqarpoq, taakkulu takorusutartik pissarsiaraat: Tassa tallimanngornermi unnukkut illoqarfimmi nuannaffiusumi kalaallit rockernerannik tusarnaarneq.
Aalborgimi Studenterhusetip silataani aamma nuannattoqarpoq, tassami inuusuttut Aalborgimi Kalaallit Illuutaanneersut puisip neqaanik aamma qaleralimmik suppilianik agguaapput, ilaatigut raajartaqarlutik. Inuusuttut taakku suliniummi Arctic Street Foodimut ilaapput, tassanilu kalaalimernit kangiamiut igasariaasiannik ilaartorlugit nutaaliortuullutik. Tamanna pølsevognemit Kalaallit Illuutaata aningaasaliiffigisimasaanit allatut suliarineqarsimasumit pivoq.
Kalaallit aqqusinermi nerisassiaat tusarnaarianut aamma sanioqquttunut soqutiginnittunut tuniniarneqarput.