Assit takukkit: 1000 km arpareerluni apuuttoq
Arpattartut marluk maajip qaammataani 500 aamma 1000 kilometerit arpareerlutik ataasinngormat ualikkut apuuffissaminnut apuussimapput.
Nuummi nunamilu sumiiffinni allani maajip qaammataa timersornermut timimillu aalatitsinermut atorneqartarpoq. Timersortartut peqatigiiffiisa tamarmik illoqarfimmi innuttaasunut matortik ammatittarpaat, Nuummi sammisassat assigiinngitsut 100-nik amerlanerusutaaqqissuunneqarsimapput. Sammisassat amerlallutillu assigiinngitsorpassuupput, soorlu mittarfimmi apparneq, timigissartarfimmi akeqanngitsumik sungiusarneq, triathlon aamma angerlarsimaffeqanngitsunik arsartitsineq kiisalu kalattuunik sungiusarneq.
Sammisassat Maaji Nuan-imit ilaatigut aaqqissuunneqarsimapput ilaatigullu illoqarfimmi suliffippassuarnit namminnerlu kajumissusilinnit aaqqissuunneqarsimallutik.
Sammisassatt tamarmik Nuummi innuttaasut akeqanngitsumik peqataaffigisinnaavaat, sammisassammi kommunimit kiisalu najukkami aningasaliissuteqartartunit, illoqarfimmi innuttaasut aalanerulersinniarlugit ataatsimoornerusoqarnissaanik kissaateqartunit aningaasaliiffigineqarsimammata.
Pissarsiffik: Maaji Nuan!
Orla Mølgaard aamma Mika Lyberth qaammammi ataatsimi kilometererpassuit arpareersimallutik ataasinngormat Nuutoqqami annguffissaminnut ualikkut arfinernut anngupput, ikinngutit, ilaquttat soqutiginnittullu allat arpattunik taakkunannga marlunnik tikilluaqqusiniarlutik najuussimapput.
Ullormi arpannermi Orla Mølgaardip qaammammi matumani 1000 kilometerisut isorartutigisumi arpalluni anguniakkani anguaa, Mika Lyberthilu maajip qaammataani katillugit 500 kilometerisut isorartutigisumi arpassimalluni.
Orlap 10 kilometerit kingulliit ataasinngormat arpakkamigit minutsit 40.40-t atorsimavai. Mikap minutsit 41.30-t atorsimallugit.
Suliniummut Maaji Nuan-imut atatillugu arpattoqarpoq. Orla Mølgaardip oqaatigaa, arpattarneq immikkut imatut nuannarisorsuunngikkaluarlugu, naak siorna Maaji Nuan-ip ingerlanneqarnerani aamma arpassimagaluarluni. Siorna qaammammi ataatsimi katillugit 600 kilometerisut isorartutigisoq arpaffigisimavaa.
Arpattut marluullutik Nuutoqqamut apuukkamik nersualaarneqarluartput. Ilanngutassiap aallartinnerani assit takukkit.