kunngikkormiut
Assit takukkit: Upernaviup takoqqinnera nuannaarutigigaa
Dronningip Upernaviliarnissani immikkut qilanaarisimavaa, Kalaallit Nunaanni illoqarfinni tikeraaqqaarsimagamiuk
Dronningi 1960-imi Upernavimmut tikeraaqqaarami 20-iinnarni ukioqarpoq Kalaallit Nunaannullu qatanngutini angajoqqaanilu peqatigalugit siullerpaamik angalalluni. Upernavik Kalaallit Nunaanni illoqarfinni siullerpaatillugu tikeraarpaa, tamannalu immikkuullarissutut eqqaamaniarlugu.
- Uteqqilluni alutornaqaaq. Ullumi taamanikkutut silagippoq. Qatsungalluni seqinnarillunilu, dronningi arfininngornermi ualikkut Pituffimmiit Upernavimmut tikittoq nuannaarluni qiimallunilu oqaluttuarpoq. Dronningip Naalakkersuisut siulittaasuat qorsummik annoraaqartoq tikeqatigaa.
Dronningi mittarfimmiit toqqaannartumik umiarsualiviliarpoq, tassani prinsi Dannebrogilu utaqqimmata.
Tusagassiortut kunngip umiarsuaanut Dannebrogimut ikinissamut akuerineqarput dronningip Upernavimmut tikeqqammernerani sivikitsumik apeqqarissaarfiginissaanut.
- Kalaallit Nunaannut tikeqqilluni nuannersuujuaannartarpoq. Sumiiffinnik tikereersimasanik takoqqilluni kingullermernillu immaqa allaanerusunik takusaqarluni. Seqinnerpa imaluunniit allaanerussava?
Dronningip Upernavimmut tikeqqinnissani qilanaarisorujussuusimavaa, kingullerni marlunni tikinniarnera ajornakusoortorujussuusimammat, aamma 20-nik ukioqarluni tikikkamiuk eqqaamasinnaagamiuk.
- Illoqarfiup taamanimiit alliartupiloorsimanera oqaatigisinnaavara. Taamani mittarfeqanngilaq, aamma aalajangersimasumik talittarfeqanngilaq. Illoqarfik mikineerarsuuvoq. Illut mikisuararpassuit assigiinngitsorpassuarnik qalipaatillit qaarsut tunuanniittut. Ullaakkut tikikkiartulernerput immikkut eqqaamavara, oqarpullu Upernavik taakaniittoq. Qaqqaqarpoq, ujararujussuaqarlunilu, isumaqarpungalu sunnguamilluunniit takusaqarsinnaananga. Taava isumaqalerpunga immap killingani ujararujussuaqartoq, sunaaffa qaarsut makkua illoqarfiup inissisimaffigisai. Taamani Kalaallit Nunaanni suut tamarmik angisoorujussuunerat siullerpaamik paasilerpara. Angerlarsimaffitsinni sungiusimasatsinnit annerujussuupput, dronningi oqarpoq.
Ittoqqortoormiini meeqqat inequnartut
Dronningip Kalaallit Nunaannut ukioq manna angalanini aallarnerlugu Station Nordimut ingerlaqqissinnaajumalluni Reykjavikimut timmisartoqqaarpoq. Timmisartorli pujornera pissutigalugu Station Nordimut missinnaanngilaq Reykjavikimullu utertariaqarluni, dronningilu Hotel Reykjavikimi unnuisariaqarluni.
Aqaguani Challengerimut ilaalluni Mestersvigiliarpoq, Ittoqqortoormiinullu ingerlaqqissinnaajumalluni timmisartumut allamut ilaasariaqarluni. Tamatumuuna akunnernik marluinnarnik sivisussusilimmik sivikitsuinnarmik tassaniippoq utoqqaallu najugaqatigiiffiat meeqqerivillu pulaarlugit.
- Meerarpassuit inequnavipput sapaatip-akunnerini pingasuni kipisuitsumik seqinnersimammat palerluarsimasunik. Meeqqat tamarmik nanuaqqatut brillebjørnitut isikkoqarput, kiinaat palersimaqalutik isaasalu killingi qaqorlutik, seqinersiuteqartarsimagamik, dronningi illalaarluni oqaluttuarpoq.
Air Greenlandip dronningi Pituffimmiit Savissivimmut qulimiguulimmik mikisumik Bell-212-imik tallimanngornermi timmisartuuppaa, prinsi dash-8-mik Upernaviliartoq.
- Ippassaq Savissivimmiippunga, Avanersuarmi nunaqarfiit kujallersaanni inuppassuaqanngitsumi. Piniartuupput. Ippassaammat qilalukkanik qernertanik sisamanik pisaqarsimapput, ilaatigullu piniartoq utoqqaq 72-inik ukiulik oqaluttuarpoq, qilalukkamik qernertamik qaannaminiit naalissimalluni. Taavanimiut pikkorissuupput.
Savissivimmut tikeraarnermit assilisat maani takukkit.
Aamaarutissarsiorfiusimasup Qullissat tikeqqinnissaanut qanoq qilanaartigaat?
- Sumiiffiup takoqqinnissaa pissanganartorujussuuvoq. Nalunngilarami tassani qanoq pisoqarsimanersoq. Illoqarfittut inuerutsitaasimavoq, aasalli tamaasa kinguaajusunik Qullissanut aasarsioriartortoqartarluni. Angajoqqaakka peqatigalugit illoqarfik 1960-imi suli inoqarallarmat takuara. Takoqqinnissaa soqutiginartorujussuussaaq, dronningi juulip 14-iani Qullissaliartussaq oqarpoq.
Upernavimmi sapaammi ullaakkut pisortatigoortumik tikilluaqqusisoqassaaq. Upernavimmi pisussanut pilersaarut paasisani atuaruk.
Dronningikkullu tikeraarnerannut pilersaarutit allassimaffiat tamakkerlugu takussutissiami ilanngunneqartumi takuuk.