demokratii
Assit takukkit: Unnuap qeqqata tungaanut Tasiilami innuttaasunik ataatsimiisitsineq
Naalakkersuisut Tunumi innuttaasunik ataatsimiisitsinerat pisarnermit ornigarneqarnerupput. Meeqqat pillugit isumaginninnermut suliat Tasiilami oqallisigineqarput
Tasiilami Sermiligaamilu katersortarfiit ulikkaavipput Tunup kujataani Naalakkersuisut pingasut aqqusaarmata.
Politikerit peqataasut tassaapput Kim Kielsen (S), Randi Vestergaard Evaldsen (D), aamma Nivi Olsen (D), taakkulu Tasiilaq, Sermiligaaq aamma Kulusuk piffissami juulip 27-anit 30-anut tikeraarpaat.
Meeqqat pillugit suliat ajornartorsiuterujussuit
Naalakkersuisuni ilaasortanut ataasiakkaanut innuttaasut akissuteqartikkusutaannik piviusunik apeqquteqarpassuaqarpoq, kisianni taakkunannga amerlasuut Kommuneqarfik Sermersuumit saqqummiunneqartunut kisitsisinut tupaallannartunut tunngapput, taakku takutippaat illoqarfimmi meeqqat pillugit isumaginninnermut suliat 500 ingerlanneqartut.
Atuaruk: Tasiilami meeqqat pillugit isumaginninnermut suliat 500 sinneqartut
Taakku saniatigut aamma aalisartut atugaat, qilalugartassat, sumiiffimmilu ineriartortitsineq, najukkamilu demokratii apeqquteqarfigineqarput.
Naalakkersuisunut ilaasortanut pingasunut apeqquteqarusuttut amerlammata, Tasiilami innuttaasunik ataatsimiisitsineq aatsaat unnuap qeqqanut naammassivoq. Tasiilami peqataasut 100 sinnitsiarsimavaat. Sermiligaami inuit 40 missaat takkupput.
Akisussaaffissi eqqaamasiuk
- Ilinniartitaanermik aamma inooqatigiinnermi suliassaqarfiit iluanni unammillerfissat misigisagut malitseqartitaassapput, Nivi Olsen tikeraareernerminik oqarpoq.
- Taama oqareerlunga aamma najukkami inuiaqatigiit ilaqutariillu ataasiakkaat aamma iliuuseqarnermikkut ilapittuuteqarnissaasa aalajangiunnissaat aamma pingaartuuvoq. Ajornartorsiutit iluarsineqassappata siammasissumik suleqatigiittoqartariaqarpoq. Pisariaqartitaq tassaavoq sivisuumik pimoorussamik iliuuseqarnissaq.
Atuaruk: Tasiilami aqquserngit iluarsaanneqassaput